OQO-da Qajymuqan Muńaıtpasovtyń shańyraǵy shaǵyn mýzeıge aınaldy
ShYMKENT. QazAqparat - Ońtústik Qazaqstan oblysynda kúsh atasy Qajymuqandy pir tutatyn jerlesteri Otyrar aýdanyndaǵy turǵan shańyraǵyn shaǵyn mýzeıge aınaldyrdy. Bul shara Qajymuqan Muńaıtpasovtyń 146 jyldyǵyna oraı uıymdastyrylyp otyr, dep habarlaıdy QazAqparat HAA tilshisi.
Talaıdy tamsandyrǵan alyp kúsh ıesi Qajymuqan Muńaıtpasov Otyrar jerindegi Aqtóbe aýylyndaǵy osy shańyraqta ómirge kelgen. Keıinnen otbasy músheleri Aqmola oblysyna kóship ketken. Onda biraz jyl turyp, ońtústikke oralǵan. Osy úıdi panalapty. Qaıtys bolar shaǵynda Ordabasy aýdanyndaǵy qazirgi Qajymuqan eldi mekeninde ómir súrip, sonda jerlengen. Alaıda Aqtóbedegi baspana sol kúıi qaraýsyz qalypty. Aýyldaǵy mektep dırektory men týystary Qajymuqannyń úıine bas-kóz bolyp qarap, osy ýaqytqa deıin saqtap kelgenin aıtady.
«Biz osy aýyldyń azamattary bastap, myna úı aýyldyń shetinde qalyp qoıatyn boldy dep júrip, osy úıdi mýzeı qylyp otyrmyz. Esimde, men onyń balalarymen qatar oınaǵanmyn. Kádimgi dáý adam bolatyn»,- dep eske alady Aqtóbe aýylynyń turǵyny Nyshanbaı Súleımenov.
Eski shańyraqta kúsh atasynyń 1936-47 jyldary paıdalanǵan zattary saqtaýly. Ony mektep dırektory aýyl turǵyndarynan surap alyp, jınaqtaǵan. Murajaıda kúsh atasynyń at jegip, minip júrgen arbasy da bar. 
«Biz sol arbanyń qaldyqtaryn úıdi úılerden surap júrip, osy jerge ákelip qoıdyq. Aýyl azamattary áli kúnge deıin aıtyp otyramyz. Ondaı adamdardy qansha maqtasaq ta, qansha qurmettesek te, artyq etpeıdi», - deıdi aýyl turǵyny Ámirbek Esentaev.
Shaǵyn mýzeı búginde jóndeýdi qajet etedi. Jergilikti azamattardyń ótinishimen, qazir, osy aýmaqty týrıstik ortalyqqa aınaldyrý baǵytynda tıisti jumystar júrgizilýde. Aýyl turǵyndary osy jumystardyń aıasynda shaǵyn murajaı retke keltirilip, ony sheteldik meımandar tamashalaıdy degen úmitte.
