OQO-da Qazaqstan-Ózbekstan bıznes-forýmy ótti
ShYMKENT. QazAqparat - Búgin Ońtústik Qazaqstan oblysynda iskerlik qarym-qatynasty damytý maqsatynda Qazaqstan-Ózbekstan bıznes-forýmy bastaý alyp, onyń aıasynda alǵash ret Іskerlik Keńestiń birinshi kezdesýi bolyp ótti.
Óńirlik Kásipkerler palatasynyń uıymdastyrýymen ótken forým barysynda taraptar birlesken bıznes jobalar men ınvestıtsııalyq usynystar jaıynda yntymaqtastyqty damytýdy, eksport pen ımport boıynsha úshinshi elderge kirý jaıyn talqylady, dep habarlaıdy QazAqparat tilshisi.
Forým jumysyna eki eldiń elshileri Erik Ótembaev pen Saıdıkram Nııazqojaev, QR ınvestıtsııalar jáne damý vıtse-mınıstri Qaıyrbek Óskenbaev pen Ózbekstan Respýblıkasynyń syrtqy saýda mınıstriniń orynbasary Sohıb Saıfnazarov, Ońtústik Qazaqstan oblysynyń ákimi Janseıit Túımebaev pen Ózbekstandaǵy saýda-ónerkásip palatasynyń tóraǵasy Adham Ikramov jáne qos eldiń 400-den astam kásipkeri qatysty.
Іskerlik jıynda sóz alǵan oblys ákimi Janseıit Túımebaev búgingi basqosý baýyrlas elderdiń saýda-ekonomıkalyq yntymaqtastyǵynyń artýyna múmkindik beretininin atap ótti.
«Qazaqstan men Ózbekstan - ózderiniń táýelsizdikterin nyǵaıtyp, bolashaqqa batyl qadam jasap kele jatqan memleketter. Ótken jyldarda qos taraptyń dıplomatııalyq qatynastary ózara senimge negizdele otyryp damydy. Bul baǵyttaǵy jumystar búginde jańasha qarqyn alyp, ýaqyt talabyna saı jalǵasyn tabýda. Ózbekstan Respýblıkasy Ortalyq Azııadaǵy Qazaqstannyń negizgi strategııalyq áriptesteriniń biri bolyp tabylady. Máselen, ótken jyly ekijaqty saýdanyń kólemi 30 paıyzǵa artyp, 2 mıllıard AQSh dollaryn qurady. Al eki eldiń kóshbasshylary bıylǵy jyly saýda aınalymyn 3 mıllıard dollarǵa arttyrýdy, 2020 jylǵa qaraı 5 mıllıard AQSh dollaryna deıin ulǵaıtýdy tapsyrdy. Sondyqtan qazirgi tańda eki eldiń kásipkerlerine naqty qoldaý kórsetý mańyzdy. Búgingi is-shara osy aıtylǵan mindettemelerdi júzege asyrýda septigin tıgizeri anyq. Bul ózara yntymaqtastyqqa jáne eki el arasyndaǵy berik baýyrlastyq qatynastardy ornatýǵa baǵyttalǵan taǵy bir qadam»,-dedi oblys ákimi.
Búgingi tańda Ońtústik Qazaqstan oblysy men Ózbekstan Respýblıkasy arasyndaǵy saýda-ekonomıkalyq qatynas qarqyndy damyp keledi. Máselen, ótken jyldyń qorytyndysy boıynsha eki eldiń taýar aınalymy 11,7 paıyzǵa artty. Al osy jyldyń sońǵy úsh aıynyń kórsetkishi boıynsha OQO men Ózbekstan arasyndaǵy taýar aınalymy 125,7 mln AQSh dollaryn qurap otyr. Sonymen qatar, Ońtústikten Ózbekstanǵa 73,1 mln AQSh dollary bolatyn ónim eksporttalsa, ol jaqtan bizge 52,5 mln AQSh dollary kólemindegi taýar ımporttalǵan.
Búgingi forýmnyń basty ıdeıalarynyń biri ónimderdi eń iri álemdik naryqta, sonyń ishinde Qytaı men EEO-da birlesip shyǵarý jáne jyljytý bolyp tabylatynyn aıtqan OQO Kásipkerler palatasynyń dırektory Asqar Áýbákirov aımaqtyq yntymaqtastyq forýmyn turaqty negizde ótkizý týraly usynysyn jetkizdi. Al atalǵan usynysty Ózbekstan tarapy biraýyzdan qoldady.
Bıznes-forým kezinde eki el kásipkerleriniӊ qatysýymen V2V formatynda kelissózder júrip, birqatar baǵytta iskerlik áriptestikti damytý maqsatynda ekijaqty qujattarǵa qoıyldy. Qatysýshylar ózara is-áreketter jaqyn bolashaqta óz nátıjesin bererine senim bildirdi. Sonymen qosa forýmǵa qatysýshylar otandyq taýar óndirýshiler usynǵan ónimder kórmesin tamashalady.
Aıta keteıik, qazirgi ýaqytta óńirde ózbek kapıtalymen ınvestıtsııalyq jobalar iske asyrylýda. Máselen, ótken jyly Badam ındýstrııalyq aımaǵynda gaz plıtalaryn óndirý boıynsha tseh ashyldy. Budan basqa, Shymkenttegi ındýstrııalyq aımaqta ınvestıtsııa kólemi 8,6 mln AQSh dollary bolatyn bıtým zaýyty salynyp jatyr. Oblysta osyndaı jobalardy júzege asyrý úshin jalpy aýdany 959 ga qamtıtyn 11 ındýstrıaldy aımaq, sondaı aq «Ońtústik» arnaıy ekonomıkalyq aımaq pen Kólik jáne logıstıka aımaqtary ashylǵan.
