OQO-da Qazaqstan men Reseı dárigerleri birigip ota jasady
ASTANA. QazAqparat - Qazaqstan men Reseı dárigerleri Shymkentte oblystyq onkologııalyq dıspanserinde qýyq asty beziniń qaterli isigine ota jasady, dep habarlaıdy OQO ákiminiń baspasóz qyzmeti.
Densaýlyq saqtaý basqarmasy men Qazaq onkologııa jáne radıologııa ǵylymı zertteý ınstıtýtynyń úılestirýimen ótken «Nesep-jynys júıesiniń qaterli isiginiń mýltıtártiptik tásilmen emdeý» master-klass «Shymkent» qonaqúıinde eki kúndik halyqaralyq onkoýrologııalyq forýmǵa ulasty.
Halyqaralyq forýmnyń ashylý saltanatynda Densaýlyq saqtaý basqarmasynyń basshysy M.Egizbaev qatysýshylardyń tájirıbe almasý jumystaryna sáttilik tiledi.
- Densaýlyq saqtaý basqarmasy jáne Qazaq onkologııa jáne radıologııa ǵylymı zertteý ınstıtýty onkolog-dárigerlerdiń biliktiligin arttyrýda úlken jumystar júrgizýde. Mundaı halyqaralyq tájirıbe almasýlar Shymkentte birinshi ret ótkizilip jatqan joq. Buǵan deıin Ońtústik Qazaqstanǵa medıtsınasy ozyq álem elderi Ońtústik Koreıa, Frantsııa, Túrkııa, Mońǵolııanyń úzdik mamandary kelip, tájirıbelerimen bólisken. Nátıjesinde bizdiń dárigerlerimiz de óz betinshe kúrdeli otalar jasaýǵa qol jetkizdi. Bul maqsatta Reseıdiń jáne elimizdiń úzdik dárigerlerinen de úırenerimiz az emes, - dedi basqarma basshysy.
Onkoýrologııalyq forýmnyń maqsaty - erte dıagnostıkalaýdy jaqsartyp, naýqastarǵa keshendi em júrgizip, ómirin uzartý. Qazirgi tańda búkil álem boıynsha qýyq asty beziniń qaterli isigine shaldyqqandar qatary kóbeıip keledi. Ońtústik Qazaqstan oblysynda jyl saıyn qýyq asty beziniń qaterli isigimen 60-tan asa jańa naýqas, al, atalyq beziniń qaterli isigimen 40-qa jýyq jańa syrqat anyqtalady. Biraq bulardyń 60 paıyzy derttiń III-IV satysynda tabylady. Bul másele nesep-jynys jýıesiniń obyryn erte anyqtaýda Alǵashqy medıtsınalyq-sanıtarlyq kómek dárigerleriniń ýrolog jáne onkolog mamandarymen birlese jumys isteýdiń mańyzdylyǵyn kórsetedi.
Halyqaralyq sharaǵa Reseıdiń P.A.Gertsen atyndaǵy Máskeý qalasynyń Ǵylymı-zertteý onkologııalyq ınstıtýtynyń aǵa ǵylymı qyzmetkeri, medıtsına ǵylymdarynyń kandıdaty K.Nıýshko, Reseı onkoýrologtar qaýymdastyǵynyń vıtse-prezıdenti, medıtsına ǵylymdarynyń doktory, professor, I.Rýsakov, Qazaq onkologııa jáne radıologııa ǵylymı zertteý ınstıtýtynyń onkoýrologııa ortalyǵynyń basshysy, Qazaqstan Respýblıkasynyń shtattan tys bas onkoýrology, medıtsına ǵylymdarynyń kandıdaty N.Nurǵalıev, Qazaqstan-Reseı medıtsına ýnıversıtetiniń onkologııa jáne mammologııa kafedrasynyń meńgerýshisi, medıtsına ǵylymdarynyń doktory S.Esentaeva arnaıy shaqyrtyldy. Master-klass barysynda alǵashqy medıtsınalyq-sanıtarlyq kómek dárigerlerine qýyq asty bezi qaterli isiginiń erte dıagnostıkasyn jaqsartý boıynsha dáris oqylyp, praktıkalyq tájirıbe kórsetildi. Qýyq asty beziniń qaterli isigine ota jasalyp, onkoýrologııalyq forýmda qýyqtyń jáne atalyq beziniń qaterli isikterin erte dıagnostıkalaý jáne emdeý tásilderi talqylandy.
