OQO-da qazaq tiline aýdarylǵan álemge áıgili 18 oqýlyq tanystyryldy
Basqosý barysynda ǵalym, oqytýshylar aýdarylǵan oqýlyqtarǵa qatysty óz pikirlerin bildirip, atalmysh eńbekterdi dáris berýde qoldanýǵa qatysty pikirlerin bildirdi. «100 jańa oqýlyq» jobasyna jastardyń nazaryn aýdartyp, oı-órisin keńeıtý máselesi sóz boldy. Ustazdar osy týyndylar arqyly aqparat almasý tásilderin úıretý, memlekettik tilge aýdarylǵan kitaptar men oqý quraldaryn halyq arasynda nasıhattaý jaıyn talqylady.
«Osy jobany iske asyrý arqyly áleýmettik jáne gýmanıtarlyq bilimge nazar aýdarý - jahandyq aýqymdaǵy bilim salasynda básekege qabiletti mamandar daıarlaýǵa arnalǵan platformany qamtamasyz etýge jol ashyldy. Oǵan dálel búginde qolymyzǵa tıip otyrǵan 18 kitap ekenin aıtqym keledi. Aýdarmada ártúrli mádenıetter, ártúrli tulǵalar, ártúrli oılaý qurylymy, dástúrler kezdesedi. Bul eńbekter órkenıetter arasyndaǵy mádenı suhbatty arttyra túsýge mol múmkindik beredi degen senimdemin. Sonymen qatar, aýdarylǵan oqýlyqtardyń arqasynda adamzat rýhynyń sharyqtaǵan bıikterin stýdentter óz tilinde oqı alatyn bolady», - dedi fılologııa ǵylymdarynyń kandıdaty, dotsent Baıan Arynǵazıeva.
Jıynǵa qatysqan ǵalymdardyń sózinshe, bul kitaptardyń barlyǵy da qundy. Óıtkeni tańdalyp alynǵan, kóbisi 10 retten basylyp shyqqan jáne basylymy 2014 jyldan kem emes degen talaptarǵa saı keledi. Sondyqtan osy jobaǵa engizilgen oqýlyqtyń árqaısysynyń mańyzy zor.
«Zamanaýı ulttyń basty sharty - básekege qabiletti, ǵylym men bilimdi qatar meńgergen jasty tárbıeleý. Bul rette mektep pen joǵary oqý ornynyń mańyzy zor. Jańa oqýlyqtar bilimniń naǵyz entsıklopedııasy bolmaq. Áleýmettaný, fılosofııa, til bilimi, psıhologııa salalarymen qatar, atqarylatyn jumystyń úlken bir bóligi ekonomıka ǵylymyn da qamtyp otyr. Kitaptar latyn qarpinde basyp shyǵarylǵannan keıin, olardy shetelde turatyn jastarymyz da oqı alatyn bolady. Sondaı-aq, «Rýhanı jańǵyrý» aıasynda sheteldik ǵalymdardyń eńbekterimen qatar, ózimizdiń otandyq ǵalym-pedagogtardyń da ozyq oqýlyqtaryn kádege jarata bilýimiz qajet», - deıdi M.Áýezov atyndaǵy OQMÝ-niń f.ǵ.k, dotsent Aqjol Qalshabek.
Basqosýdy uıymdastyrýshylar kitaptarmen tolyǵyraq oqyp-tanysýǵa 10 kún boıy kórme uıymdastyrylatynyn aıtady.
Aıta keteıik, «Qazaq tilindegi 100 jańa oqýlyq» jobasy aıasynda aýdarylǵan alǵashqy kitaptar QR Prezıdenti Nursultan Nazarbaevqa tanystyrylǵan bolatyn. Aty áıgili týyndylar álemniń 42 elinde 34 tilde jarııalanǵan. Jalpy taralymy 47 mln danany quraıtyn fılosofııa, áleýmettaný, psıhologııa, ekonomıka jáne basqa da pánder boıynsha álemdik oılardyń altyn qoryna engen eńbekter. Qazaqstanda aýdarylǵan oqýlyqtar 10 myń dana taralymmen jarııalanady, al mamyr aıynda olar ýnıversıtetter men qalalardyń kitaphanalaryna jiberiledi. Kelesi oqý jylynda jańa oqýlyqtar naqty bilim berý úderisinde qoldanylady dep kútilýde.
