OQO-da qatty turmystyq qaldyqtar tastaıtyn 44 polıgonǵa kúrdeli jóndeý jumystary júrgizildi

 Basqosýǵa basqarma basshylary men aýdan, qala ákimderi qatysty. Kún tártibinde eki másele - bıýdjet esebinen qurylysy júrgizilip jatqan nysandardyń sapasy men qatty turmystyq qaldyqtardyń polıgondar oryndary jaıy qaraldy.

Jıynda sóz alǵan OQO Memlekettik sáýlet-qurylys baqylaýy basqarmasynyń basshysy Quttybek Jamashev salada atqarylǵan jumystar jaıly baıandady.  Aıtýynsha, basqarma tarapynan 2016 jyly oblystyń aýdan, qalalarynda salynyp jatqan qurylys nysandaryna 1769 ret tekserý júrgizilip, onyń ózge de túrindegi baqylaý jáne qadaǵalaý uıymdastyrylǵan.

Nátıjesinde, ǵımarattarda anyqtalǵan kemshilikter boıynsha 672 nusqama berilse, nusqamamen joıylmaǵan olqylyqtar boıynsha jáne qurylys nysandarynyń sapasyn tekserip berý týraly aryz-shaǵymdarǵa sáıkes, 535 tekserý taǵaıyndaý aktileri ashylǵan. Sonymen birge, 125 merdiger men 24 jobalaýshy mekemege shara kórilip, 2 merdiger men 2 jobalaýshy mekemeniń lıtsenzııasy alynsa, 5 merdigerdiń lıtsenzııasynyń kishi jumys túrleri sheńberinde joıylyp, 3 merdigerdiń lıtsenzııasy ýaqytsha toqtatyldy.

Olqylyqtardyń basym bóligi qurylys nysandarynyń jobalyq smetalyq qujattarynyń kesh ázirlengendigi men ony paıdalanýǵa kesh tapsyrý, sonymen birge, qurylys normalaryn saqtamaýǵa qatysty. Máselen, mundaı jaǵdaılar Tólebı, Báıdibek, Sozaq, Ordabasy, Maqtaral aýdandarynda oryn alǵan.

Munan soń, oblys ákimi salada oryn alǵan kemshilikter boıynsha tıisti aýdan, qala ákimderiniń jaýabyn tyńdap, olqylyqtardy tez arada joıý qajettigine toqtaldy. Tekserýler júrgizilip, shara kórilgen kompanııalardyń azdyǵyn synǵa alǵan óńir basshysy bul jumystardy qaıta elekten ótkizip, salǵyrt merdigerlerdi qaıta taldaý jasaýdy júktedi.

Oblystyq qurylys basqarmasy men oblystyq memlekettik sáýlet-qurylys baqylaýy basqarmasynyń basshylaryna aıtylǵan nusqamalarda Janseıit Qanseıituly jumystardy atqarýdaǵy kemshilikterdi joıýdyń jańa tásilin oılastyryp, usynys jasaýdy tapsyrdy. Sonymen birge, qurylys salasyndaǵy sapany baqylap, jumystar qarqynyn bilip otyrý syndy jumystar jıyntyǵyn quraıtyn arnaıy onlaın-reestr ázirleýdi júktedi.

Munan soń, kún tártibindegi ekinshi másele aıasynda oblystyq tabıǵı resýrstar jáne tabıǵat paıdalanýdy retteý basqarmasynyń basshysy Muhıt Otarshıev Ońtústik Qazaqstan oblysynyń aýmaǵynda qatty turmystyq qaldyqtar tastaıtyn polıgondar oryndarynyń qazirgi jaǵdaıyna taldaý júrgizip, 2008-2015 jyldar aralyǵynda qoldanystaǵy qatty turmystyq qaldyqtar tastaıtyn 44 polıgonǵa qurylys jáne kúrdeli jóndeý jumystary júrgizilip, sanıtarlyq-ekologııalyq talaptarǵa sáıkestendirilgenin habarlady.

«Qazirgi tańǵa 844 eldi meken 176 polıgon ornymen qamtylǵan. Alaıda, eldi mekennen polıgonǵa deıin 400 metrden 90 km-ge deıingi ara qashyqtyqty qurap otyr. Onyń ishinde, 259 aýyl boıynsha 20 km-den 100 km-ge deıin ara qashyqtyqta. ıAǵnı, bul eldi mekenderde turmystyq qaldyqtar beı-bereket tastalýda degen sóz», - dedi basqarma basshysy.

Maqtaralda nebári 4, Shymkentte 2 ǵana qoqys polıgony baryn jetkizgen M.Otarshıev oblystaǵy birqatar aýdan, qalalarda qoqys oryndarynyń jetkiliksizdigin, bul máseleni retteýde jergilikti atqarýshy organdardyń asyqpaı otyrǵanyn alǵa tartty. 

Tazalyqty saqtaý máselesine qatysty oıyn bildirgen oblys ákimi senbilikterdi turaqty ótkizip otyrý máseleni sheshpeıtinin eskertip, bul jaıdy retteý úshin arnaıy mekemeniń aınalysýy kerektigin jetkizdi.

Basqarma basshysynyń baıandamasyn qanaǵattanarlyqsyz dep eseptegen ákim aýdan, qalalardaǵy shashylyp jatqan qoqystardy jınap, otandyq jáne sheteldik qonaqtar kelgende uıalmaıtyndaı jaǵdaı jasaý qajettigin, onyń ishinde, kóshe, nysandar mańynan ájethana salý jaıyn, kópqabatty úılerdiń kireberisterin (podezd) taza ustap, jaryqtandyrý máselesin qatań tapsyrdy. Bul jumystarǵa barlyq qurylymdardyń jappaı atsalysýy qajettigin eskertken J.Túımebaev qoqystardy jınaýǵa 3 kún merzim berse, ájethana salýǵa 1 apta, kireberisterdi retteýge 2 apta ýaqyt berdi. Atalǵan merzim aıaqtalǵannan keıin oblys əkimi tıisti nysandardy eskertpesten aralaıtyn bolady.