OQO-da kásipkerlikke kedergi keltirý boıynsha 49 zańbuzýshylyq anyqtaldy

ShYMKENT. QazAqparat - Ońtústik Qazaqstan oblysynda bir jyl kóleminde memlekettik qyzmetkerlerdiń shaǵyn jáne orta bıznestiń jumysyna zańsyz aralasý men kedergi keltirý boıynsha 49 zańbuzýshylyq deregi anyqtalǵan.

Bul týraly búgin Sybaılas jemqorlyqqa qarsy is-qımyl máseleleri boıynsha oblystyq kásipkerler palatasynda ótken forýmda sóz boldy, dep habarlaıdy QazAqparat tilshisi.

Bıznes ókilderiniń aıtýynsha, sheneýnikter kóbinese kásipkerlerden  artyq qujattar suratyp, kórsetiletin memlekettik qyzmetterdi ýaqytynan kesh kórsetedi.  Sonymen qatar kásipkerlerdiń sotqa júginýine kedergi keltirý jaıttary da kezdesken. Osyndaı zańbuzýshylyqqa jol bergender qazir tıisti jazalaryn alyp ta jatyr.

«Eger qatardaǵy qyzmetkerler bolsa, bizge usynys joldaý arqyly memlekettik qyzmetkerlerdiń tártiptik komıssııasynda qaraýdy usynamyz. Al, eger bul basqarýshy býyndaǵy azamattar bolatyn bolsa, olardyń jaýaptylyǵy Ádep keńesinde qaralady»,- deıdi OQO Kásipkerlik palatasynyń sybaılas jemqorlyqqa qarsy is-qımyl jáne kásipkerlerdiń quqyn qorǵaý Keńesiniń múshesi  Ǵanıjan Asanuly.

Jıynda sondaı-aq ótken jyly kásipkerlerge qysym jasap, para alǵandar týraly da aıtyldy. Máselen, Shymkent qalalyq sáýlet jáne qala qurylysy bóliminiń burynǵy sektor meńgerýshisi isker azamattan qujat jasap berý úshin 100 myń teńge kóleminde para alǵan bolatyn. Ol sot úkimimen kináli dep tanylyp, 4,5 mln teńge aıyppul tóleýge mindetteldi. Al, Tólebı aýdanynyń ortalyǵy Leńgir qalasynyń eks- ákimi kásipkerlik nysan salatyn jer berýge 100 myń teńge kóleminde para alǵany úshin qylmystyq jazaǵa tartyldy.  Sol sııaqty Arys aýdandyq  kásipkerler bóliminiń basshysy qyzmettik kabınetinde 150 myń teńge kóleminde para alǵany úshin sottaldy.  Kentaý qalasy ákiminiń burynǵy orynbasary da kásipkerden  2 mln teńge kóleminde para alǵany úshin úsh jylǵa bas bostandyǵynan aıyrylǵany belgili.