OQO-da kásipkerler zańsyz tekserýge qatysty prokýrorlardyń kómegine júgingen

ShYMKENT. QazAqparat -  Ońtústik Qazaqstan oblysynda prokýratýraǵa kásipkerlerden zańsyz tekserý boıynsha 27 aryz túsken. Óńirdegi memlekettik baqylaýshy organdary tarapynan zańsyz tekserýler tıylmaı tur. Bul týraly oblystyq kásipkerler palatasynda ótken basqosýda aıtyldy, dep habarlaıdy QazAqparat tilshisi.

Qadaǵalaýshy organ ókilderi bul kemshilikterdi memlekettik qyzmetkerlerdiń zańdy bilmeýinen oryn alǵan dep otyr. Bul rette zań qyzmetkerleri naqty mysaldar keltirip, memlekettik organ mamandary men kásipkerlerdiń quqyqtyq saýattylyǵyn arttyrýǵa tyrysty. Óz kezeginde «Nur Otan» partııasynyń aımaqtaǵy fılıaly men «Atameken» kásipkerlik palatasynyń ókildigi de osyndaı aryzdar túsip otyrǵanyn alǵa tartty. Tekserýlerdiń basym kópshiligi qazba baılyqtardy ıgerýmen aınalysatyn bıznes ókilderine qatysty ekeni aıtyldy. Al, kásipkerlik palatasynyń statıstıkalyq málimetteri boıynsha jıi tekserýshilerdiń qataryn farmatsevtıkalyq baqylaý, qoǵamdyq medıtsına jáne tótenshe jaǵdaılar qyzmetkerleri tolyqtyryp otyr.

«Melekettik baqylaýshy - qadaǵalaýshy organdar qoldanystaǵy zańdardy tolyq bilmeýi saldarynan oryn alady dep oılaımyz. Mysaly, kásipkerge  jospardan tys tekserý taǵaıyndalǵan jaǵdaıda eskertý bir kún buryn, al erekshe tártippen ishinara teksergen jaǵdaıda 30 kún buryn beriledi. Taldaý júrgizý barysynda mundaı kemshilikter únemi qaıtalana beretinin kórdik»,-deıdi Quqyqtyq statıstıka jáne arnaıy esepke alý komıteti OQO basqarmasynyń aǵa prokýrory Qýanysh Sraılov.

Kásipkerler basqosýda tekserýler zańdy túrde qalaı taǵaıyndalatynyn surap bildi.