OQO-da kásipkerler halyqqa otandyq ónimderdi tómen baǵada usynbaq
ASTANA. QazAqparat - OQO-da 9 áleýmettik dúken men saýda qatarlary ashyldy. Bul týraly búingi selektorlyq rejımde ótken apparattyq jıynda málim boldy, dep habarlaıdy QazAqparat ákimniń baspasóz qyzmetine silteme jasap.
Qazirgi tańda baǵa turaqtyly kún tártibindegi basty másele ekenin aıtqan aımaq basshysy azyq-túlik taýarlarynyń baǵalaryn negizsiz ósirgen azamattar jaýapqa tartylatynyn qatań túrde eskertti. Sonymen qatar, barlyq aýdan, qaladan taýar óndirýshiler men dıqandarǵa óz ónimderin saýdalaýǵa múmkindik beretin áleýmettik bazar ashýdy tezdetip qolǵa alýdy tapsyrdy. Jáne de ol bazarlarda «Ońtústik» AIO men «Yrys» mıkroqarjy uıymy qarjylandyrylǵan jobalardyń ónimi saýdalanýyn mindettedi.
Esterińizde bolsa, ótken aptadaǵy selektorlyq jıynda baǵa turaqtylyǵyn saqtaý maqsatynda aımaq basshysy otandyq taýar óndirýshilerdiń saýdalanatyn áleýmettik bazar ashýdy aýdan, qala ákimderine tapsyrǵan bolatyn. Osynyń negizinde Túlkibasta 4, Tóle bı aýdanynda 3 áleýmettik dúken men saýda qatarlary, al Túrkistan qalasynda saýda oryndary ashylyp otyr.
Jıynda sóz alǵan oblys ákiminiń orynbasary B.Jamalov búginde oblysta qajetti degen 19 azyq-túlik baǵasynyń turaqty ekenin aıtyp, basqa oblystarmen salystyrǵanda baǵa kórsetkishi boıynsha 6 orynda ekenin jetkizdi. Sonymen qatar, janar-jaǵarmaı men dızel otyny jetkilikti ekenin atap ótti.
«Búgingi tańda oblysta baǵa ósý qaýpi tek qana sıyr eti men taýyq etiniń ósimi bar. Qalǵan azyq-túlik baǵasynda ósý qaýpi baıqalmaıdy. Turaqtandyrý qorynda da qajetti azyq-túlik jetkilikti. Búgingi tańda qorda - 1 myń tonna qant, 2 myń tonna kartop, 1 myń tonna pııaz, sábiz 1 200 tonna, kúrish 70 tonna, al sıyr eti 200 jáne 30 tonna makaron ónimderi bar», - dedi B.Jamalov.
Aıta keteıik, Ońtústik Qazaqstanda jergilikti taýar óndirýshilerdiń tanymaldylyǵyn arttyrý jáne baǵa turaqtylyǵan saqtaý maqsatynda alǵash ret «Ońtústik» aımaqtyq ınvestıtsııalyq ortalyǵy men «Yrys» mıkroqarjy uıymy qarjylandyrǵan jobalardyń aptalyq jármeńkesi bastaý alǵan bolatyn.
Endi eki aptada bir ótetin jármeńkede jeńildetilgen nesıe alyp, kásibin júrgizgen 40-qa jýyq kásipker halyqqa otandyq ónimderin tómen baǵada usynatyn bolady. Aıta keteıik, atalǵan qarjy uıymdary jyl basynan beri 2182 jobany qarjylandyrǵan.
