OQO-da kásipkerden 1 mln dollar bopsalaǵan eks-depýtat 10 jylǵa sottaldy
ShYMKENT. QazAqparat - Ońtústik Qazaqstan oblysynda kásipkerden 1 mln dollar bopsalaǵan Saıram aýdandyq máslıhatynyń burynǵy depýtaty 10 jylǵa bas bostandyǵynan aıyryldy, dep habarlaıdy QazAqparat HAA tilshisi. Oblystyq qylmystyq ister jónindegi mamandandyrylǵan aýdanaralyq soty "Baha-baha" laqap atymen áıgili Baqytjan Aımyrzaǵa jazasyn túrmede óteý jáne múlkin tárkileý týraly úkim shyǵardy. Atalǵan sot ony kásipker Batyrbek Zııataevtan asa iri kólemde aqsha bopsalaǵany jáne zańsyz qarý saqtaǵany úshin kináli dep tapty
Sot otyrysy barysynda eks-depýtat «jábirlenýshiniń bostandyǵyn zańsyz shektedi» degen aıyptaýlar rastalmady. Sondyqtan sýdıa bul bapty aıyptaý úkiminen qysqartty. Sondaı-aq «qarýdy zańsyz saqtaý» týraly aıyptaýlarda da qatelikter ketkeni anyqtaldy. Sol sebepti tergeýshige qatań sógis berý jáne istiń bul bóligin qosymsha tergeý týraly sheshim qabyldandy. Óz kezeginde mundaı úkim men sheshimge aıyptalýshy men onyń qorǵaýshysy da kelisetinin málimdedi.
«Biz sot barysynda tergeýshiler tarapynan birqatar qatelikter ketkeni týraly aıttyq, sot qaraý barysynda oǵan kóz jetkizdi. Máselen, ustalǵan kezde tabylǵan qarý aıyptalýshynyń áıeli Ramazanovanyń atyna tirkelgen bolatyn. Alaıda tergeý barysynda ol qarý aıyptalýshyǵa tıesili sııaqty kórsetilgen. Sol sııaqty máseleler boldy. Jalpy, bopsalaý úshin 10 jyl berý - az emes», - dedi aıyptalýshynyń qorǵaýshysy Shymyrbek Aǵabekov.
Eske salaıyq, polıtseıler burynǵy depýtatty jergilikti kásipkerden 1 mıllıon dollar bopsalap jatqan jerinen qolǵa túsirgen bolatyn. Tergeý barysynda bopsalaýshynyń birneshe toıhana men balalarǵa arnalǵan oıyn-saýyq kesheniniń qojaıyny ekeni, kezinde aýdandyq máslıhat depýtaty bolǵany anyqtaldy. Al jábirlenýshi Batyrbek Zııataev sol Saıram aýdanynyń qazirgi depýtaty bolyp tabylady. Ol sondaı-aq temir-beton zaýytynyń, ıaǵnı "Temirtas" JShS-niń dırektory bolyp júrip, kúdiktimen otyz jyl boıy dos bolǵan. Naýryzdyń 17 kúni Baqytjan Aımyrza óz úıinde qudaıy as berip, jora-joldastarynyń basyn qosqan. Kezdesý sońynda otaǵasy jasy jetpiske taıaǵan joldasy Zııataevty alyp qalǵan. Oǵan temir-beton zaýyty kezinde óziniń ataqty aǵaıynyna tıesili bolǵanyn alǵa tartyp, odan 1 mıllıon dollar bopsalaǵan. Olaı bolmaǵan jaǵdaıda, kásiporyndy kúshtep tartyp alýǵa bel býǵan. Artynsha ol ózi talap etken aqshanyń bir bóligin, 9 mıllıon 400 myń teńgesin óz úıiniń aýlasynda alyp jatqan jerinen ustalǵan. Polıtsııa qyzmetkerleri kúdiktiniń úıin qaraý barysynda 9 qarý-jaraq pen myńǵa jýyq ár túrli kalıbrli oq-dárilerdi tárkiledi.
Keıinnen atyshýly is Oblystyq qylmystyq ister jónindegi mamandandyrylǵan aýdanaralyq sotta qaralǵan bolatyn. 54 jastaǵy aıyptalýshy bastapqy kezde Qylmystyq kodekstiń úsh baby boıynsha aıyptaldy. Oǵan asa iri kólemde aqsha bopsalaý, adamdy óz erkinen tys bostandyǵynan aıyrý, qarý-jaraq, jarylǵysh zattardy zańsyz ıelengeni úshin kúdik taǵyldy. Alaıda birqatar aıyptaýlar sot kezinde dáleldenbedi.
