OQO-da qarttar arasynda shahmattan jarys ótti

ShYMKENT. QazAqparat -  Ońtústik Qazaqstan oblysynda qarttar arasynda shahmattan jarys ótti. Qazyǵurt aýdanynda uıymdastyrylǵan sharaǵa  qala jáne aýdandardan kelgen aqsaqaldar qatysty, dep habarlaıdy QazAqparat tilshisi.

Elbasynyń «Bolashaqqa baǵdar: Rýhanı jańǵyrý» maqalasyn qoldaý maqsatynda ótken saıysty Qazyǵurt aýdandyq sport jáne dene shynyqtyrý bólimi uıymdastyrdy.

Jarysqa qatysqan oıynshylardyń barlyǵy   zeınet jasyna jetken qarttar boldy. Sebebi, oı-óristi damytatyn shahmat oıynyna el aǵalarynyń qyzyǵýshylyǵy joǵary. Jyldam oılap, durys sheshim qabyldaýǵa jattyqtyratyn taqta ústindegi tartystyń eń qart qatysýshysy 77 jastaǵy  Rahmatýlla Tashov ekeni anyqtaldy. 

Aqsaqal osyndaı saıystarǵa qatysý arqyly aqyl oıynyn nasıhattap,  jastarǵa úlgi etkisi kelgenin aıtady. Úzdik oıyn órnegin kórsetken qarttar oılaý qabiletteriniń ushqyr ekenin taǵy bir dáleldedi.

Oıynshylar qarsylastaryna des bermeı, jeńimpaz  ataný úshin baryn saldy. Oıyn nátıjesinde jeńimpazdarǵa baǵaly syılyqtar men alǵys hattar tabystaldy.

Aıta keteıik, qatysýshylardyń bul oıynǵa birinshi ret kelýi emes. Osyǵan deıin de olar kóptegen ıntellektýaldy oıyndardyń kórigin qyzdyrǵan edi.