OQO-da qarqyndy baý kólemi 1000 gektarǵa ulǵaıady
ShYMKENT. QazAqparat - Ońtústik Qazaqstan oblysynda qarqyndy baý kólemi 1000 gektarǵa ulǵaıady. Qazyǵurt aýdanynda 70 gektarǵa qarqyndy baý egilip, maýsymdyq kezeńde 100 adamdy jumyspen qamtymaq, dep habarlaıdy QazAqparat HAA tilshisi.
Baý egýdi qolǵa alǵan «Birlik» AÓK» óndiristik kooperatıvinde 86 gektar sýarmaly jeri bar. Sonyń 70 gektaryna 200 myń túp alma kósheti otyrǵyzylǵan. Italııa qural-jabdyqtarmen jaraqtandyrylǵan baý 3 jyldan soń ár gektaryna 50-60 tonnadaı ónim berýge qaýqarly. Munda qazir almanyń Golden Delıshes, Red Delıshes, Gala, Fýdjı, Grenı, Smıt sekildi túrleri túıindep tur. Qarqyndy baýdyń jalpy ınvetıtsııalyq quny - 1,2 mlrd teńge. Jobaǵa jumsalǵan qarjynyń 1 mlrd teńgesin «Aýyl sharýashylyǵyn qarjylaı qoldaý qory» AQ berse, 200 mln teńgesi jeke qarjy sanalady.
«Qazir munda 18 adam turaqty jumyspen qamtylsa, maýsym kezeńderinde 100 adamdy eńbekpen qamtımyz dep otyrmyz. Baýymyz óziniń ónim berý deńgeıine 3 jyldan keıin jetedi. Sol kezde gektarynan 50-60 tonnaǵa deıin ónim alynady. Al bıyl gektaryna 5-6 tonnadan ónim alýdy kózdep otyrmyz», - deıdi «Birlik» AÓK» óndiristik kooperatıviniń atqarýshy dırektory Bekjan Qalıbekov.
Ótken jyly kooperatıv jumysymen oblys ákimi Janseıit Túımebaev arnaıy tanysyp, atqarylǵan iske oń baǵasyn berdi. 
«Qazirgi tańda oblysta 2 myń gektarǵa jýyq qarqyndy baý bar. Olarǵa qajetti qural-jabdyqtar shetelden tasymaldanatyn. Endigi maqsat - baý-baqshaǵa qajetti beton baǵanalary men tor, plastıkalyq qurylǵylardy ózimizde óndirýge múmkindik týyp otyr. Bul óz kezeginde almanyń ózindik quny arzandaı túsedi degen sóz. Sondaı-aq baǵbandyqty jetik meńgergen maman daıarlaý isine de mán beriletin bolady. Jalpy, oblystaǵy ıntensıvti baýlardyń kólemin taǵy da 1000 gektarǵa ulǵaıtý josparymyzda bar», - dedi Janseıit Qanseıituly.
Aıta keteıik, Qazyǵurt aýdanyndaǵy qarqyndy baýdyń montajdaý jumystaryn «Zıramaks» kompanııasy ornatqan. Atalmysh kooperatıv maman daıarlaý isine de mán berip, agronomdardyń bilimin Italııada jetildiripti. Aldaǵy ýaqytta kooperatıv basshylyǵy qarqyndy baý egemin degen ońtústikqazaqstandyq sharýalarǵa aqyl-keńes berip, tájirıbelerimen bólispek. Bul óz kezeginde óńirdegi qarqyndy baýlardyń sanyn kóbeıtip, alma ımportyn azaıtýǵa yqpal etpek. Sondaı-aq eksportty ulǵaıta túsetin bolady.
