OQO-da qaraýsyz júrgen mal aıypturaqqa qamalatyn boldy
ShYMKENT. QazAqparat - Ońtústik Qazaqstan oblysynda ІІD men oblys ákimshiliginiń bastamasymen barlyq aýdan aýmaǵynda ıesiz júrgen, tańbalanbaǵan maldarǵa arnalǵan arnaıy «aıypturaq» ashylýda. Atalǵan is-shara arqyly oblys aýmaǵynda mal urlyǵynyń aldyn alý kózdelip otyr, dep habarlaıdy QazAqparat HAA tilshisi.
Mundaı alǵashqy aıypturaq Kentaý qalasynda ashyldy. Munda kúndelikti tártip saqshylary ıesiz júrgen úı janýarlaryn anyqtap, aıypturaqqa toǵytady. Odan soń ıesin izdestirilip, olarǵa ákimshilik aıyppul salynady. Syrǵalanǵan jáne tańbalanǵan maldardy qujattarymen kelgen zańdy ıelerine qaıtarylyp jatyr. Polıtseıler jýyrda qala kóshelerinde jaıylyp júrgen 7 sıyrdy taýyp alyp, arnaıy aıypturaqqa qamaǵan. Keıinnen ıesi tabylǵan ýaqytta olarǵa qatysty ákimshilik shara qoldanyldy. Osyndaı shara óńirdegi mal urlyǵyn 4 esege azaıtqan. Máselen, Kentaý qalasynda 2016 jyldyń 4 aıynda 12 ret mal urlansa, osy jyldyń atalǵan merziminde 3 derek qana tirkelgen. Onyń ekeýi boıynsha urlanǵan mal tabylǵan.
Tájirıbe kórsetkendeı, mal urlyǵynyń kóp bóligi erkin jaıylymdarda mal ıeleriniń salǵyrttyǵynan oryn alyp otyr. Kóbinde tórt túliktiń ıeleri maldaryn jaıylymǵa jiberip, qaraýsyz qaldyrady. Al maly joǵalǵan jaǵdaıda aldymen ózderi izdep, keıinnen ishki ister organyna habar beredi. Bul jaýapsyzdyq áreketter polıtseıdiń qylmysty izin sýytpaı ashýynda kedergi keltiredi eken.
