OQO-da qaraqshylyq jasaǵandar úıdegi eki balany baılap, taldyryp tastaǵan
ShYMKENT. QazAqparat - Ońtústik Qazaqstan oblysynda qaraqshylyq jasaǵandar úıdegi eki balany baılap, taldyryp tastaǵan. Jaǵa ustatar jaǵdaı Ordabasy aýdanynda bolǵan, dep habarlaıdy QazAqparat tilshisi.
7 aqpanda Ordabasy aýdandyq ishki ister basqarmasyna jergilikti turǵyn aryzdanǵan. Ol óz aryzynda úıine belgisiz tulǵalar basa-kóktep kirip, qaraqshylyq shabýyl jasaǵanyn kórsetken.
Oqıǵa ornyna kelip jetken polıtseıler belgisiz tulǵanyń turǵyn úıge basa kóktep kirip, úıde bolǵan 6 jáne 12 jas shamasyndaǵy balalardyń aıaq-qoldaryn matamen baılap tastaǵanyn anyqtapty. Onymen qoımaı qaraqshylar jetkinshekterdiń moıyndarynan qylqyndyryp, taldyryp tastaǵan. Sóıtip, úıdegi altyn buıymdaryn alyp ketken. Osylaısha úı ıesine jarty mıllıon teńgedeı shyǵyn keltirgen.
Jedel izdestirý sharalaryn júrgizgen polıtseıler osy qylmysty jasady degen kúdikpen jergilikti jerdiń 20-25 jas shamasyndaǵy turǵynyn ustady. Qazir eki sezikti de ýaqytsha tergeý abaqtysyna qamaldy.
Qylmys sotqa deıingi tergep-tekserý biryńǵaı tizilimine tirkelip, birneshe saraptamalar taǵaıyndaldy.
