OQO-da qar qursaýynda qalǵan aýyldarǵa jol ashyldy
ShYMKENT. QazAqparat - Ońtústik Qazaqstan oblysynda qar qursaýynda qalǵan aýyldarǵa jol ashyldy. Qalyń qar jaýyp kólik joldary jabylǵan Báıdibek, Sozaq aýdandarynda jaǵdaı qalypqa kelip, oblys ortalyǵymen qatynas ornatylǵan, dep habarlaıdy QazAqparat HAA tilshisi.
Báıdibek aýdanyndaǵy Shybyqbel asýynda qardyń qalyńdyǵy bıyl 3 metrden asqan. Osy jol arqyly aýdandaǵy bes birdeı aýyldyń halqy ortalyqqa qatynaıdy. Jańbyr aralasa jaýǵan soń, qatyp qalǵan qardy kúreý aýyr tehnıkalardyń ózine qıynǵa soqqan. Sondyqtan jaýapty mekeme bar kúshti osy tóńirekke jumyldyrypty.
«Búgingi tańda arnaıy tehnıkalar jumys istep jatyr. Ózderińiz kórip turǵandaı eldimekender arasynda baılanysty qamtyp otyrmyz. Bir Báıdibek aýdanynyń ózinde 13 tehnıkamen 13 adam kún-tún demeı jumys isteýde», - deıdi «Ońtústik joldary» KMM-niń dırektory Asylbek Ómirálıev.
Apta basynda Sozaq aýdanyn oblys ortalyǵymen baılanystyratyn «Odaman» asýynda da kólik qatynasy qıyndaǵan bolatyn. Qazir mundaǵy jaǵdaı da qalypqa túsken. Jol tolyqtaı tazartylyp, turǵyndar dittegen jerine ýaqtyly jetýde.
«Budan 5-6 jyl buryn myna jerdi atpen balalar kelip arshyp, ábigerge túsýshi edi. Kúrekpen neshe kún júrip, tazalaıtynbyz. Endi 2-3 jyl boldy, joldar jabylmaıdy. Aýyl arasy júrip-turýymyz da rettelip qaldy», - deıdi jergilikti turǵyn Qýanyshkúl Bekpenbetova.
Al, jolda qalǵandar úshin bes birdeı jylytý beketi ashylǵan. Nysannyń bári qatty otynmen, azyq-túlikpen qamtylypty. Kólik dálizi jabylǵan kezde árbir beketke 30 jolaýshy qonystana alady. Aıta keteıik, oblysta qar basyp qalý qaýpi joǵary bes asý bar. Qazir barlyǵyndaǵy jaǵdaı turaqtalǵan.
