OQO-da qalalyq oqýshylar aýylǵa baryp, ondaǵy turǵyndarǵa kómektesti

ShYMKENT. QazAqparat - Ońtústik Qazaqstan oblystyq bilim basqarmasy Elbasy maqalasyn qoldaý maqsatynda tyń jobany qolǵa aldy. «Bir apta aýylda» dep atalatyn joba asynda shymkenttik oqýshylar Báıdibek aýdanyna sapar shegip, aýyldyń tynys tyrshiligimen tanysýda. Sonymen qatar kıeli jerlerdi aralap, aýyldyń tirligine qaraılasyp jatyr, dep habarlaıdy «QazAqparat HAA tilshisi.

Alǵashqy joba jelisimen 15 oqýshy aýylǵa attandy. Olar aldymen, Báıdibek aýdanynyń ortalyǵy Shaıan aýylyndaǵy Appaq ıshan meshit - medresesimen jáne osynda ornalasqan murajaımen tanysty. Budan keıin balalar Kókterek aýylyndaǵy «Bereke» sharýa qojalyǵyna kelip, naǵyz aýyl tirshiligine aralasty. Qoı baqty, aǵash jaryp, ot jaqty. Sharshaý basarǵa balyq aýlady. Ashyqqanda aýyldyń qoıý aıranynan dám tatty.

«Óte qyzyq sapar bolyp jatyr. Aýyl tirshiliginiń ońaı emes ekendigine kózimiz jetip keledi. Aǵash jardyq, ot jaqtyq, sháı qaınattyq. Qıyn bolsa da maǵan unady»,- deıdi oqýshylardyń biri Balǵynbek Kádirbek.

Balalardyń kezekti sapary áıgili Aqmeshit úńgirine saıahattaýmen jalǵasty. Tabıǵattyń tylsym syryn ishine búkken ǵajaıyp meken kimdi de bolsyn, keremet áserge bóleıtini anyq. Jol boıy osyndaı kórinisterdi tamashalap barǵan balalar taý baýraıyndaǵy «Bolashaq» lagerine ornalasty. Olar osy lagerde bir apta bolyp, aýyldyń tirshiligimen tanysatyn bolady.

«Sapardyń maqsaty - Elbasy maqalasyndaǵy «Rýhanı jańǵyrý» baǵdarlamasyn júzege asyrý, ony balalarǵa túsindirý jáne túsindirip qana qoımaı, qala balalaryna aýyl tirshiligin kórsetip, eńbekke beıimdeý boldy»,- deıdi Oblystyq bilim basqarmasynyń bólim basshysy Zúbaıra Altaeva.