OQO-da isti bolǵan azamat depýtattyqqa úmitkerler tiziminen alynyp tastalǵan
ShYMKENT. QazAqparat - Ońtústik Qazaqstan oblysynda jergilikti máslıhattaǵy bos oryndarǵa depýtat saılaýy qorytyndylandy. Oblystyq saılaý komıssııasynyń tóraǵasy Álibek Ómirálıevtiń aıtýynsha, barlyq saılaý komıssııalaryna azamattardan aryzdar men shaǵymdar túspegen. Tek №11 oblystyq saılaý okrýginde bes úmitkerdiń tórteýin kandıdattyqtan alyp tastaýǵa baılanysty saılaý toqtatylǵan, dep habarlaıdy QazAqparat HAA tilshisi.
Saıası naýqanǵa áý basta 15 úmitker ótinish tapsyrǵan. Biraq, keıbiri saılaý kúni jaqyndaǵanda óz ótinishin keri qaıtaryp alypty. Sondaı-aq birqatarynyń qujattary durys toltyrylmaǵan. Sol sebepti, oblystyq saılaý komıssııasy birqatar úmitkerlerdi tirkeýden shyǵarǵan. Máselen, №11 saılaý okrýgi boıynsha úmitkerler óz erkimen jáne saılaý týraly deklaratsııada durys aqpar kórsetpegeni úshin alynyp tastalǵan. Sondaı-aq taǵy bir úmitkerdiń buryn isti bolǵany anyqtaldy.
«Oblystyq №11 saılaý okrýgi boıynsha bes úmitkerdiń tórteýi kandıdattyqtan alynyp, 23 naýryz kúni bul okrýg boıynsha saılaý ótkizbeý týraly sheshim qabyldandy. Іsti bolǵan úmitkerge toqtalsaq, Baqytjan Kópbaevtyń ústinen aýdandyq sotqa Abaı Pirálıevten aryz túsken. Ol aryzynda úmitkerdiń 2001 jyly sottalǵanyn kórsetipti. Keıinnen komıssııa músheleri bul aryzdy teksere kele, Baqytjan Kópbaevtyń rasymen de sybaılas jemqorlyq qylmysyn jasaǵany úshin tórt jylǵa sottalǵanyn anyqtady. Eki jyly alynyp tastalǵan. Eki jylyn ótep shyǵypty. Zań boıynsha sottalǵan azamattyń depýtattyqqa saılanýǵa quqy joq bolǵandyqtan ol úmitkerlikten alynyp tastaldy»,-dedi Álibek Ómirálıev.
Al, oblystaǵy №25 jáne 31 oblystyq okrýgteri boıynsha saılaý zań talaptaryna saı ótkizilgen. Maqtaral aýdany boıynsha 80 paıyz daýyspen Nurlan Omarov, Saıram aýdany boıynsha Bekasyl Tólendıev oblystyq máslıhattyń depýtattary bolyp saılandy. Qalalyq máslıhattarǵa da halyq qalaýlylaryn tańdaý óz deńgeıinde júrgizilgen. Oblystyq saılaý komıssııasy tóraǵasynyń sózinshe, osy okrýgter boıynsha 77 myń saılaýshy tirkelgen bolsa, olardyń ishinde Maqtaral men Saıram aýdandaryndaǵy turǵyndar belsendi túrde qatysqan. Máselen, Maqtaral aýdanynda 86,9, Saıram aýdanynda 88,9 paıyz daýys berse, Saıramdaǵy №3 saılaý okrýginde saılaýshylardyń 96 paıyzy úmitkerin tańdaýǵa kelgen. 
