OQO-da Israıl Saparbaıdyń «Táńiriniń quldary» atty dramasy sahnalandy
ShYMKENT. QazAqparat -Ońtústik Qazaqstan oblysy, Maqtaral aýdanyndaǵy Jetisaı teatrynda Israıl Saparbaıdyń «Táńiriniń quldary» atty shyǵarmasy sahnalandy. Premerany kórýge avtordyń ózi arnaıy kelip qatysyp, teatr ártisteriniń ónerin tamashalady, dep habarlaıdy QazAqparat tilshisi.
Atalǵan qoıylym Memleket basshysynyń «Bolashaqqa baǵdar: Rýhanı jańǵyrý» atty maqalasyndaǵy «Týǵan jer» baǵdarlamasyn júzege asyrý maqsatynda jáne aqyn-sazger, dramatýrg, táýelsiz «Platınaly tarlan» syılyǵynyń jáne memlekettik «Parasat» ordeniniń ıegeri, Ońtústik Qazaqstan oblysynyń jáne Maqtaral aýdandarynyń Qurmetti azamaty - Israıl Saparbaıdyń 75 jasqa tolý mereıtoıy aıasynda kórermenge usynyldy. Spektakldi kórýge avtormen qatar Maqtaral aýdanynyń ákimi Ǵalymjan Ismaılov bastaǵan jergilikti bılik ókilderi, aqynnyń oqyrmandary, ustazdar qaýymy, oqýshy jáne stýdent jastar, sondaı-aq birqatar tanymal tulǵalar qatysty.
Aıta keteıik, «Táńiriniń quldary» dramasy Gúldana esimdi aýyl qyzynyń bilim qýyp qalaǵa kelgen ómir jolynan bastalady. Basty keıipker Sándigúl atty apaıdyń páterin jaldap turady. Úı ıesiniń de Gúldanamen jasty Jan degen jalǵyz uly bolady. Jalpy, ary taza, jany pák aýyl qyzyna Sándigúldiń kózi túsip, aldaǵy ýaqytta ulyna alyp berip, kelin qylyp alǵysy keletindigin ishteı sezdirip júredi. Bir kúni keshke Jan anasynan aqsha suraıdy. Anasy aqsha beredi. Jan qasyna Gúldanany da erte ketedi. Sodan eki jas túngi klýbtardyń birine baryp kóńil kótermekshi bolady. Sóıtip júrgende Gúldana Qarajan atty jigittiń «quryǵyna» túsip, jipsiz matalady. Jan qansha jerden janqııarlyq áreket etse de bolmaıdy. Aqyrynda, Qarajan qyzdyń aryn aıaqasty etip qorlaıdy. Ýaqyt óte kele Gúldananyń júkti ekeni málim bolady. Ańǵal qyz Qarajanǵa senedi. Biraq, Qarajan Gúldananyń senimin aqtamaıdy. Ony jaı ǵana ýaqytsha ermek etkenin bildiredi. Keıinnen, aı-kúni tolyp bosanǵan Gúldana balasymen jalǵyz qalady. Negizinen, osy Gúldananyń aıanyshty taǵdyryna Sándigúl apaı kináli bolyp shyǵady. Óıtkeni, ol qolynda ustaǵan qyzdaryn jaman joldarǵa ıtermelep, tabys tabýdy ádetke aınaldyrǵan bolatyn. Taǵdyr jazýymen Sándigúl de opyq jep, balasy Jannan da aıyrylady. Balasy ony tastap ketedi.
«Jalpy, bul kórinis jaı kórinis emes - búgingi zamannyń kórinisi. Jiti baqylaı bilgenge bizdiń qoǵamda - aldanǵan Gúldanalar da júr, qanquıly Qarajandar da júr, aıarlyqpen kún kórgen Sándigúlder de júr, eń aıanyshtysy - Gúldanalardan týylǵan tastandylar da júr»,- deıdi kórermenderdiń biri Baýyrjan Myrzaqulov.
Qoıylym bitip, sahnada óner kórsetken teatr ártisterine jappaı qoshemet kórsetildi. Ásirese, Gúldana rólin somdaǵan aktrısa erekshe kózge túsip, óziniń ártistik sheberligine jınalǵan jurt rızashylyqtaryn bildirdi. Al el aldynda sóz sóılegen qoıylymnyń avtory Israıl Saparbaı bul shyǵarmasynyń maqsatyn ashyp aıtty. ıAǵnı, qazirgi qoǵamdaǵy túrli keleńsizdikterge jan aýyrta júrip, ony aqyndyq elekten ótkizip, halyqqa qaıta kórsetý boldy. Jalpy, keshtiń taǵylymdyq máni men estetıkalyq áseri óte joǵary deńgeıde bolǵanyn kórmender de tilge tıek etti.
