OQO-da isker qyz-kelinshekter jas kásipkerlerge sheberlik dáristerin ótkizdi
ShYMKENT. QazAqparat - Ońtústik Qazaqstan oblysynda isker qyz-kelinshekter jas kásipkerlerge sheberlik dáristerin ótkizdi. Jastardyń kásibı saýattylyǵyn arttyrýda paıdasy orasan sharany «Nur Otan» partııasynyń Shymkent qalalyq fılıaly qoldaǵan, dep habarlaıdy QazAqparat HAA tilshisi.
Jıynda onlaın-bıznes, ıaǵnı, ǵalamtor arqyly tabys tabýdyń joldary aıtyldy. Mamandar bir baǵytpen shektelmeı, álemdik naryqqa ǵalamtor arqyly shyǵý qajettigin aıtady. Basqosýda sondaı-aq «Atameken» Ulttyq kásipkerler palatasy aımaqtyq isker áıelder keńesiniń tóraıymy Alma Arhabaeva sóz sóılep, jastarǵa úlken jetistikke jetýdiń joldaryn túsindirdi. Onyń sózinshe, adamnyń ózine talap pen maqsat qoıýy - tabysty kásiptiń alǵashqy baspaldaǵy bolyp tabylady.
«Bári bıznes ashý kezinde bar máseleni aqshaǵa ákelip tireıdi. Joq, olaı emes. Aqshany tabýǵa bolady. Birinshi ol aqshany qalaı jáne qaıda qoldaný kerektigi jaǵyn durys bilý kerek. Jastar jaǵy osy turǵyda qatelesip jatady. Bizdiń maqsat - olarǵa baǵyt-baǵdar kórsetý, tek qalada ǵana emes, aýyl-aýdandarda kásipke ıkemi men qyzyǵýshylyǵy bar áıel, qyz-kelinshekterdi bızneske tartý. Ásirese jastarǵa bıznes bastaý úshin senimdilik jetispeıdi. Adamda sol senimdilik bolýy kerek. Eger óz qalaýyńnyń oryndalýyna kúsh salmasań, bireýdiń qııalyn iske asyrýǵa jumys isteısiń»,- deıdi Alma Arhabaeva.
Aıta keteıik, elimizdegi kásipkerlik salasynyń damýy - qyz-kelinshekterdiń bızneske aralasý belsendiligin kúsheıtken.
Resmı derekterge súıensek, ońtústik óńirde uıymdastyrylǵan bıznes-keńesterge bıyl 3567 adam qatysqan. Onyń 957-si, ıaǵnı 27%-i názik jandylar eken. Bul top úıdegi sharýasynyń kóptigine qaramastan, túrli jobalar daıyndap, olardy sapaly iske asyrýǵa da sheber kórinedi. 2017 jyly oblys boıynsha usynylǵan 485 bıznes-jospardyń 25%-i osy qaýymǵa tıesili.
