OQO-da iri qara maldy asyldandyrý jumystary úsh esege artqan
ASTANA. QazAqparat - OQO-da iri qara maldardy asyldandyrý jumystary 3 esege artqan. Bul týraly oblystyq Aýyl sharýashylyǵy basqarmasynyń basshysy Serik Turbekov aımaqtaǵy mal sharýashylyǵyn damytý barysy týraly baspasóz máslıhatynda aıtty.
Onyń málimetinshe, sońǵy eki jylda óńirdegi iri qara mal sany 35 myń basqa artyp 865 myńǵa jetti, qoı-eshki 155 myń basqa artyp 3 mln 893 myń boldy, jylqy 16 myńǵa artyp 230 myń, túıe 23 myń, qus sany 2 mln 518 myń basty quraǵan. Sáıkesinshe, mal sharýashylyǵy ónimi et óndirý 111,4 %-ǵa, sút óndirý 104,8 %-ǵa, jumyrtqa óndirý 112,1 %-ǵa, jún óndirý 110,1 %-ǵa artyp otyr.
«Óńirde mal sharýashylyǵyn damytý boıynsha respýblıka tarapynan qabyldanǵan baǵdarlamalar nátıjeli iske asyrylýda. Atap aıtqanda, «Sybaǵa» baǵdarlamasymen 26,2 myń bas analyq ІQM satyp alynyp jospar eki esege oryndaldy. Búgingi kúni tuqymdyq túrlendirýge 72,3 myń bas analyq ІQM qatysýda. «Altyn asyq» baǵdarlamasymen 50,3 myń bas qoı satyp alynyp, jospar 2,3 esege oryndaldy. Tuqymdy túrlendirýge 186,1 myń bas qatysýda, jalpy analyq basqa shaqqandaǵy úlesi 11,5 %. «Qulan» baǵdarlamasy aıasynda 4,3 myń bas jylqy satyp alynyp, jospar 1,6 esege oryndaldy», - dedi.
Munan bólek, basqarma basshysy oblys halqyn qus eti, jumyrtqa jáne qaıta óńdeý ónimderimen qamtamasyz etý maqsatynda aldaǵy ýaqytta birqatar iri ınvestıtsııalyq jobalardy iske asyrý josparlanyp otyrǵanyn aıtty. Taratyp aıtsaq, 2018 jyly Túlkibas aýdanynda jyldyq qýattylyǵy 30 myń tonna qus etin óndirýge qaýqarly «Ak Kazyna» qus fabrıkasy ashylsa, Ordabasydaǵy «Ordabasy qus» JShS-nyń kúrketaýyq etin óndirý jáne qaıta óńdeý kesheniniń qýattylyǵyn 20 myń tonnaǵa ulǵaıtý jobasy tur.
Qoı sharýashylyǵyna qatysty bııazy júndi qoıdy kóbeıtý isi Tólebı, Qazyǵurt, Saryaǵash aýdandarynda damytylyp jatsa, qarakól qoıyn ósirý Túrkistan, Sozaq, Otyrar, Maqtaral aýdandarynda, etti baǵyttaǵy qoı Shardara, Báıdibek, Ordabasy aýdandary men Arys qalasynda atqarylyp jatyr.
Baspasóz jıynynda málim bolǵan taǵy bir aqpar, sońǵy 7-8 jylda óńirimizdegi iri qara maldy asyldandyrý jumystary 3 esege artqan. Máselen, 2009 jyly 38 myń bas ІQM qoldan uryqtandyrylǵan bolsa, 2016 jyly 117 myń bas ІQM asyldandyrý jumystary júrgizilipti.
Kezdesýde mal sharýashylyǵyn memlekettik qoldaýǵa qatysty jumystar da nazardan tys qalmady. Sondaı-aq, jıynda salada atqarylǵan veterınarııalyq is-sharalar jaıy da aıtyldy.
