OQO-da ınvestorlar eki kún elektr stansasyn salady
ShYMKENT. QazAqparat - Ońtústik Qazaqstan oblysynyń ákimi Janseıit Túımebaev óńirdegi iri jobalarǵa ınvestıtsııa salýǵa nıet bildirgen sheteldik Germanııa men Golandııa elderinen kelgen ınvestorlarmen kezdesti, dep habarlaıdy ákimniń baspasóz qyzmeti.
Kezdesýde sheteldik kásipkerlerdiń jobasymen tanysqan oblys basshysy aımaqtyń ekonomıkalyq áleýetin baıandap, ınvestorlarǵa memleket tarapynan kórsetiletin jeńildikterdi atap ótti.
«Úsh mıllıonǵa jýyq halqy bar óńir úshin bul joba óte qajet jáne óte tıimdi. Sebebi, biz elektr energııasynyń 65 paıyzyn syrttan tasymaldap otyrmyz. Óńir turǵyndarynyń qajettiligi jaz aılarynda 350-370 MVt bolsa, qys mezgilinde 450-480 MVt elektr energııasyn tutynamyz. Sondyqtan da biz qajettilikti ózimizde óndirý úshin osy syndy jobalardy júzege asyrýymyz qajet. Buǵan óńirdiń tabıǵaty kún sáýlesinen elektr jaryǵyn óndirýge óte qolaıly»,-dedi ákim.
Maqtaaral aýdanynda eki kún elektr stansasy men asfalt-beton zaýytyn salýdy qolǵa alyp jatqanyn aıtqan sheteldik kásipkerler jergilikti bılik tıisti qujattardy rásimdeýde qolaıly jaǵdaı jasaǵanyn jetkizdi.
Salynatyn kún elektr stansasy jobasyna germanııalyq NwComp Solar GmbH kompanııasy 7 mln evro ınvestıtsııa quıyp otyrǵanyn aıtqan «Kompanııa KADI» JShS-niń bas dırektory Murat Davreshov kompanııa Qazaqstanda birqatar jobalardy júzege asyrǵanyn málim etti.
Jetisaı qalasynyń qoqys polıgony aýmaǵynda salynatyn elektr stansasynyń qýattylyǵy 4,8 MVt. Búgingi tańda ruqsat berý qujattamalary ázirlenip, qurylys jumystary osy jyldyń qarasha aıynda bastalady dep josparlanýda.
Ekinshi jobanyń ınvestory gollandııalyq VTK Investments B.V kompanııasy. Aýdannan 100 MVt kún elektr stansasyn salý boıynsha ekijaqty memorandýmǵa qol qoıylǵan bolsa, búginde 300 ga jer bólý úshin tıisti jumystar júrgizilýde. Joba quny 150 mln evro.
Búgingi tańda ınvestor Taılan Karamanlı osy syndy jobany Aqmola oblysynda júzege asyrýda.
