OQO-da ınvestıtsııalyq ortalyq men bank kásipkerlerdi qoldaý jobasyn júzege asyrady

ASTANA. QazAqparat - «OŃTÚSTІK» AIO» JShS basqarma tóraǵasy Q.Baıtóre jáne «AsiaCredit Bank (AzııaKredıt Bank)» AQ-nyń Shymkent qalasy boıynsha fılıalynyń dırektory T.Adeshov ózara túsinistik pen yntymaqtastyq týraly memorandýmǵa qol qoıdy, dep habarlaıdy oblys ákiminiń baspasóz qyzmeti.

Atalǵan memorandýmǵa sáıkes biregeı bıznes jáne áleýmettik jobalardy ilgeriletý jáne iske asyrý máseleleri boıynsha jumystar júzege asyrylatyn bolady. Sonymen qatar, ortaq qyzmet máseleleri boıynsha konferentsııa, forým jáne semınarlar  birlesken túrde uıymdastyrylady.

Qujatqa qol qoıý rásiminde «OŃTÚSTІK» AIO» JShS basqarma tóraǵasy Q.Baıtóre seriktestik qatynastaryn qurý oblys ekonomıkasyn taǵy da damytýǵa yqpal etetindigin, sondaı-aq bıznesin ári qaraı damytqysy keletin kásipkerlerge baǵa jetpes kómek bolatyndyǵyn jetkizdi. 

Aıta ketý kerek, aımaqtyq ınvestıtsııalyq ortalyq pen bank arasyndaǵy uzaq merzimdi, nátıjeli jáne ózara tıimdi seriktestik Ońtústik Qazaqstan oblysyndaǵy shaǵyn jáne orta kásipkerlik sýbektilerin qoldaý boıynsha birlesken  jobalardy júzege asyrýǵa baǵyttalǵan.

Degenmen, atalǵan yntymaqtastyq aımaqtaǵy shaǵyn jáne orta bıznesti damytýǵa ǵana emes, ortaq jańa basym ınnovatsııalyq jobalardy júzege asyrýǵa da serpin beredi dep kútilýde.