OQO-da halyqty jumyspen qamtý ortalyǵynyń basshysy 5 jylǵa sottaldy
Oblystyq sottyń málimetinshe, Ǵabıt Ordabaev Qylmystyq Kodekstiń 28-babynyń 5-bóligimen, 366-baby 3-bóliginiń 1,2-tarmaqtarymen («Para alý») jáne 366-baby 3-bóliginiń 1,2,4-tarmaqtarymen aıyptalǵan. Oǵan qatysty kelisimdik is júrgizý tártibi negizinde qylmystyq is bólek qaraldy.
Sotta belgili bolǵandaı, aıyptalýshy Sozaq aýdanynyń halyqty jumyspen qamtý ortalyǵy dırektorynyń ýaqytsha mindetin atqarýshy laýazymyn atqaryp júrip, «Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan «Eńbek» baǵdarlamasy» aıasynda qylmys jasaǵan. Qyzmettik ókilettikterin teris paıdalana otyryp, qorqytyp alý jolymen jáne adamdar tobynyń aldyn ala sóz baılasýy arqyly birneshe ret para alǵan. ıAǵnı, qysqa merzimdi kásiptik oqý boıynsha ótkizilgen memlekettik satyp alýdyń jeńimpazy «Lıder PRO» JShS-men jasasqan kelisimsharttar somasynyń 5 %-yn (1 200 000 teńgeni) seriktestik ókilinen talap etken. Sóıtip Ońtústik Qazaqstan oblysynyń jumyspen qamtýdy úılestirý jáne áleýmettik baǵdarlamalar basqarmasy basshynyń orynbasary S.M.Polatovqa, Ońtústik Qazaqstan oblysy jumyspen qamtýdy úılestirý jáne áleýmettik baǵdarlamalar basqarmasynyń jumyspen qamtý baǵdarlamasyn monıtorıngileý bóliminiń bas mamany A.M.Taýkebaevqa, «Ordabasy aýdanynyń halyqty jumyspen qamtý ortalyǵy» KMM-niń dırektory E.K.Berdimuratqa jáne osy Ortalyqtyń bólim basshysy B.A.Ýteshovqa «Lıder PRO» JShS-niń ókilinen 1 000 000 teńge para alýyna járdemdesken.
Basty sot talqylaýy barysynda burynǵy sheneýnik óziniń kinásin moıyndaǵan. Osy qylmystary úshin aıyptalýshyǵy túpkilikti memlekettik mekemeler men uıymdarda basqarý qyzmetterin atqarý quqyǵynan ómir boıyna aıyra otyryp, bas bostandyǵynan aıyrý jazasy taǵaıyndaldy. Jazany qylmystyq-atqarý júıesiniń ortasha qaýipsiz mekemesinde óteý belgilendi.
Aıta keteıik, buǵan deıin dál osy qylmystyq topty basqarǵany jáne 5,9 mln teńge kóleminde para alǵany úshin oblystyq jumyspen qamtýdy úılestirý basqarmasy basshysynyń burynǵy orynbasary Sátjan Polatov 5 jylǵa bas bostandyǵynan aıyrylǵan bolatyn.