OQO-da halyqaralyq jolaýshylar habyn damytý jaıy talqylandy
ShYMKENT. QazAqparat - Búgin Ońtústik Qazaqstan oblysyna jumys saparymen kelgen QR Premer-Mınıstriniń birinshi orynbasary Asqar Mamın jumysshy toppen birge Shymkent qalasyndaǵy halyqaralyq áýejaıdy qaıta qurý boıynsha jıynǵa qatysty. Májiliske jumysshy toptan bólek, oblys ákimi Janseıit Túımebaev qatysyp, Shymkent áýejaıy eldegi eń qarqyndy damyp kele jatqan áýejaılardyń biri ekenin aıtty, dep habarlaıdy QazAqparat tilshisi.
Aımaq basshysy osy jyldyń 9 aıynda mundaǵy jolaýshylar aǵymy 600 myńnan astam adamdy qurap, ótken jyldyń tıisti kezeńimen salystyrǵanda 30 paıyzǵa artqanyn atap ótti. Jıynda jolaýshylar habynyń halyqaralyq jolaýshylar men oblys turǵydaryna álemdik deńgeıde qyzmet kórsetetin birqatar jobalar otyrysqa qatysýshylardyń nazaryna usynyldy. Onda oblys ákiminiń birinshi orynbasary Darhan Satybaldy 2020 jylǵy TMD elderiniń mádenı astanasy retinde Shymkent qalasynyń jarııalanýyna baılanysty aýmaqtardyń damý baǵdarlamasyna sáıkes Shymkent álemdik deńgeıdegi qala retinde damýy josparlanǵanyn aıtty.
«2020 jylǵy TMD elderiniń mádenı astanasy retinde Shymkent qalasynyń jarııalanýyna baılanysty - halyqaralyq deńgeıdegi túrli mádenı sharalardy ótkizýge erte bastan daıyndalý qajettiligi týyndaýda. Ońtústik Qazaqstan oblysy kórshi Ózbekstan Respýblıkasymen shekaralas bolǵandyqtan, kórshi eldiń shekaralas aımaqtarymen áleýmettik-mádenı jáne ekonomıkalyq qarym-qatynas jaqsaryp keledi. Joǵaryda aıtylǵan barlyq alǵysharttardan oblys ortalyǵyna jaqyn jáne alys shetelderden kelýshilerdiń sany eselep ósetini belgili. Osyǵan baılanysty, oblystyń týrısttik, halyqaralyq baılanystar áleýetin damytý maqsatynda áýe jáne temirjol kóligi ınfraqurylymyn qarqynyn arttyrý qajet. Bul óz kezeginde oblys ekonomıkasyna oń áser etip, bıýdjet kiristeriniń ulǵaıýy men jańa jumys oryndary ashylýna septigin tıgizedi», - dedi oblys ákiminiń birinshi orynbasary.
Sondaı-aq, ol jolaýshylar haby qurylysynyń jobasy búgingi zaman talabynan týyndaǵan joba retinde baǵalaı otyryp, ákimdik tarapynan áýejaıdyń aýmaǵyn keńeıtý, ınfraqurylym qurylysy men avtomobıl joldary júıesin jolaýshylar aǵynyna saı damytý boıynsha birqatar usynystardy jetkizdi. Budan bólek, aımaq basshysy týrıstik áleýeti mol óńirde ekinshi temir jol vokzalyn salý jaıy men Tashkent-Túrkistan baǵytynda temir jol qatynasyn damytýdy usyndy.
Májiliste sonymen birge, «Qazaqstan temir Joly» UK» AQ Prezıdenti Qanat Alpysbaev «Óńirlerdi damytý 2020» baǵdarlamasynda basymdyqty mıllıon turǵyny bar Almaty men Shymkent qalalaryn damytý haby retinde qarastyrylǵanyn málimdedi. Osy qalalardyń damýy Almaty men Shymkent aglomeratsııasyn damytýdyń uzaq merzimdi josparlary aıasynda júzege asyrylatynyn da atap ótti.
«Baǵdarlamada sonymen birge Shymkenttegi áýejaı habynyń qurylysy qarastyrylǵan. Qazirgi ýaqytta Shymkent áýejaıy elimizdiń qarqyndy damyp kele jatqan áýe aılaqtarynyń biri bolyp tabylady. 2014 jyl men 2016 jyldy salystyrǵanda jolaýshylar tasymalynyń ósýi 40% -dan asady. Lufthansa Consulting Gmbh kompanııasy ázirlegen áýejaıdyń damý strategııasyna sáıkes 2030 jylǵa qaraı trafık kólemi jylyna 3 mln adamǵa jetedi. Sheteldik avıakompanııalar osy oblystan Úrimshi, Kıev, Delı, Dýbaı Tegeran, Pekın, Praga baǵyttary boıynsha reıster ashýǵa qyzyǵýshylyq tanytýda. Ońtústik Qazaqstan oblysy - tarıhı turǵydan mańyzdy aımaq, ol sheteldik týrısterdiń qyzyǵýshylyǵyn týdyrady. Aımaqtyń týrıstik klasterin damytý aımaqtyń tıimdi ekonomıkalyq damýyna yqpal etedi jáne áýejaıdyń óndiristik qýattylyǵynyń ósýine yqpal etedi»,-dedi Qanat Alpysbaev.
Baıandamalyshardy tyńdap, óz oıyn bildirgen Asqar Mamın Shymkent - respýblıkanyń negizgi ındýstrııalyq, týrıstik jáne mádenı ortalyqtarynyń biri ekenin aıtyp, mıllıonǵa jýyq halqy bar bul qalanyń damýyna Memleket basshysy da erekshe kóńil bóletinin atap ótti.
Ońtústik Qazaqstan oblysy - elimizdiń eń mańyzdy kóliktik haby ekenin aıtqan Asqar Mamın kezdesý qorytyndysy boıynsha QR Investıtsııalar jáne damý mınıstrligine áýejaı men áýejaı ınfraqurylymynyń tujyrymdamalyq damýy boıynsha usynystar ázirlep engizýdi tapsyrdy.
