OQO-da halyqaralyq ınvestıtsııalyq forým ótedi
ASTANA. QazAqparat - Ońtústik Qazaqstan oblysynyń ákimdigi Qazaqstan Respýblıkasynyń mádenıet jáne sport mınıstirligimen birlese otyryp, 2017 jyldyń 14-16 qarashasynda Shymkent qalasynda «Ontustik Tourism.Invest-2017» halyqaralyq týrısttik ınvestıtsııalyq forým ótkizgeli jatyr, dep habarlaıdy QazAqparat.
Forým aıasynda týrıstik ónimderdiń tanystyrylymy jáne Uly Jibek Joly boıynda ornalasqan kórikti jerlerdiń fotokórmesi ótedi, sonymen qosa «SilkRoadFair» jármeńkesi men qonaqtarǵa arnalǵan aqparattyq týrlar uıymdastyrylady.
Forým jumysyna Qytaıdyń Memlekettik týrızm basqarmasy, Qazaqstan Respýblıkasynyń týrızm salasynyń jáne alys-jaqyn shetel týrızm ındýstrııasynyń ókilderi, memlekettik organdar, qazaqstandyq jáne halyqaralyq iskerlik qaýymdastyq ókilderi, kásipodaqtar, týrıstik uıymdar, assotsıatsııalar men ınvestıtsııalyq kompanııalar qatysady.
Forýmnyń maqsaty - tıimdi iskerlik kezdesýlerdi uıymdastyrý,Uly Jibek jolynda týrızm ındýstrııasyn damytýdyń ózekti máseleleri boıynsha pikir almasý, B2B - kezdesýleri, sondaı-aq Jibek joly boıyndaǵy týrıstik ónimderdi damytý, óńirdiń ınvestıtsııalyq múmkindikterin tanystyrý jáne ınvestorlardy tartý bolyp tabylady.
