OQO-da gıdroenergetıkalyq áleýeti bar 43 núkte anyqtaldy
«Shymkent» áleýmettik-kásipkerlik korporatsııasy» UK AQ Ońtústik Qazaqstan oblysy aýmaǵyndaǵy ózen aǵystarynyń energetıkalyq áleýetin zerttedi. Óńirdegi tórt negizgi ózen aǵystary boıynsha (pre-feasibility dep atalatyn) aldyn ala tehnıkalyq-ekonomıkalyq negizdeý nátıjesinde Ońtústik Qazaqstan oblysy aýmaǵynda jıyntyq qýaty 120 MVt-ty quraıtyn tıimdi gıdroenergetıkalyq áleýeti bar 43 núkte anyqtalǵan. OQO Aımaqtyq kommýnıkatsııalar qyzmetinde ótken brıfıngte «100 naqty qadamnyń» 52-shi jáne 56-shy qadamdary boıynsha jumys istep, atqarylǵan sharýalar týraly aıtqan «Shymkent» ÁKK» UK AQ basqarma tóraǵasy Talǵat Alpysbaevtyń aıtýynsha, Qazirgi ýaqytta «Shymkent» ÁKK» oblysta shaǵyn gıdroenergetıkany damytýǵa ınvestorlardy tartý jumystaryn júrgizip jatyr. Alǵashqy nátıjeler de bar.
Máselen, korporatsııa jetekshiligi Endustriyel Elektrik túrik kompanııasymen birlese otyryp, Túlkibas aýdanynda belgilengen qýaty 4 MVt, quny 6 mln dollar shaǵyn GES salý úshin birlesken kásiporyn qurdy. Jobany iske qosý 2017 jylǵa josparlanǵan.
Baspasóz jıynynda T.Alpybaev oblys ákimdiginiń qoldaýymen jeke ınvestor Saryaǵash aýdanynda qýaty 2 MVt bolatyn shaǵyn GES jobasyn iske asyryp jatqanyn, mnan bólek, búgingi tańda 2 joba ázirlený ústinde ekenin málim etti.
«Oblystyń shaǵyn gıdroenergetıkasyn odan ári damytý, ınvestıtsııalar tartý jáne kásipkerlikti damytý maqsatynda «Shymkent» ÁKK» barlyq múddeli tulǵalarǵa ózen aǵystarynyń energetıkalyq áleýetin zertteý nátıjelerin usynýǵa daıyn. Sonymen qatar, Ońtústik Qazaqstan oblysy aýmaǵynda shaǵyn GES jobalaryn iske asyrý kezinde qajetti konsýltatsııalyq qoldaý kórsetýge árdaıym ázir», - dedi T.Alpybaev.
Aıta keteıik, qazirgi ýaqytta oblystaǵy kásiporyndar men turǵyndardyń elektr energııasyn jyldyq tutynýy shamamen, aıyna 400 MVt quraıdy. Onyń 114 MVt-y (29%) ishki qýat esebinen óndirilse, 286 MVt (71%) Qazaqstannyń basqa óńirlerinen satyp alynady.
