OQO-da gaz baǵasyn kótermek bolǵan mekeme basshylyǵy synnyń astynda qaldy
ShYMKENT. QazAqparat - Ońtústik Qazaqstan oblysynda «QazTransGaz Aımaq» basshylyǵy kógildir otynnyń baǵasyn kóteremiz dep otyr. Tarıftiń ósetini týraly jańalyq Tabıǵı monopolııalardy retteý jáne básekelestikti qorǵaý komıtetiniń Ońtústik Qazaqstan oblysy boıynsha departamentiniń basshylyǵy men qoǵamdyq keńes músheleri, bılik ókilderi jáne tutynýshylar shaqyrylǵan jıynda aıtyldy, dep habarlaıdy QazAqparat HAA tilshisi.
«Kaztransgaz Aımaq» AQ óńirdegi fılıalynyń dırektory Erjan Jeksembınovtiń sózinshe, tarıf 1-shi tamyzdan bastap ósedi. Tutynýshylar úshin shamamen 19, bıýdjettik mekemeler úshin 45%-ǵa qymbattaıdy. Ulttyq operatordyń málimdeýinshe, buǵan negiz bolǵan sebepterdiń biri - dollardyń qymbattaýy.
Alaıda mundaı jańalyq jıynǵa qatysqandar men depýtattarǵa unaı qoımady. Tarıfti kóterý úshin keltirilgen sebepterdi halyq qalaýlysy Ómirzaq Meldehanov orynsyz dep tapty. Al, baǵany kóterýge negiz bolatyn qujattardy «Kaztransgaz Aımaq» basshylyǵy kórsete almaýy aqylǵa qonymsyz, dep atady.
«Halyqty qanaýdy qoıyńdar. Dollardy bunda da qystyryp qoıypsyńdar. Syltaý bəri. Qalǵany keregi joq bizge, aınalaıyn, qanshaǵa kóterildi, sony aıt»,- dep ashýǵa mindi «Nur Otan» partııasynyń Shymkent qalalyq bólimshesiniń tóraǵasy Ómirzaq Meldehanov.
Kógildir otyn baǵasyn kóterýdi jarııalaý úshin jıyn ótkizgen kommýnalshylar osylaısha synnyń astynda qaldy.
«Halyqty sorlatatyn boldyq. Qoldaryńda naqty sandary bar birde bir qujat joq. Halyqtan ne jasyryp otyrsyńdar? Qupııa jasaýdyń qajeti qansha? Bos sózdi qoıyp, naqty smetany kórsetińder»,- dedi «Nur Otan» partııasynyń Shymkent qalalyq bólimshesiniń tóraǵasy Ómirzaq Meldehanov.
