OQO-da festıval júldegeri atanǵan fılmder on kún boıy kórsetiledi
ASTANA. QazAqparat - Búgin Shymkenttegi oblystyq opera jáne balet teatrynda «Altyn saqa» balalarǵa arnalǵan qysqametrajdy fılmder festıvali uıymdastyrylyp, ótkizildi.
Oblys ákimi baspasóz qyzmetiniń habarlaýynsha, Ońtústik Qazaqstan oblysynda alǵash ret ótken festıvaldiń maqsaty - kınoındýstrııa salasyn damytý, jas býyn rejısserlarǵa shyǵarmashylyq serpin berý, olardyń kásibı deńgeıin kóterý, áleýmettik máselelerdi kótere otyryp, kórermenderge oı tastaý, balalarǵa arnalǵan qysqametrajdy fılmder men anımatsııalyq týyndylardy, beınerolıkterdi jaryqqa shyǵarý.
«Elbasymyz N.Á.Nazarbaev «Óskeleń urpaqtyń tárbıesine oń yqpalyn tıgizýi tıis patrıottyq taqyryptaǵy fılmder óndirisi qajet, Qazaqstandyqtardyń jas býynyn adamgershilik rýhta tárbıeleýge baǵyttalǵan anımatsııalyq fılmder jasaý mańyzdy» dep aıtqan bolatyn.
Osyǵan baılanysty, balalarǵa arnalǵan qysqametrajdy fılmder festıvalin uıymdastyrý arqyly balalar men jasóspirimderdiń júreginde otansúıgishtik qasıetterdi qalyptastyrý bolyp tabylady», - dedi uıymdastyrýshylar.
Festıvalde respýblıkalyq «Balapan» telearnasynyń dırektory Láılá Sultanqyzy jáne Qazaq Ulttyq óner akademııasynyń dotsenti, kınotanýshy, kınosynshy, Ónertaný ǵylymynyń kandıdaty Gúlnár Amangeldiqyzy qazylyq etti.
Festıvaldiń erejesine sáıkes 30 tapsyrys kelip tústi, onyń 23-i erejege saı iriktelip alyndy. Onyń ishinde 13 qysqametrajdy, 7-i anımatsııalyq fılmder, úsheýi áleýmettik rolıkter bolyp otyr.
Qazylar alqasynyń sheshimimen qysqametrajdy fılmder boıynsha bas júldeni «Qýat» (rej:Nurbol Absemetov) alsa, І oryndy «Aısulý» fılmi (rej: Nurtazaev Darhan), al júldeli ІІ oryn «Qaharman» fılmi (rej: Mútálıev Hamıd), III oryn- «Men qorqamyn» qysqametrajdy fılmi (rej:Baqytjan Kósherov) ıemdendi. Sondaı-aq, anımatsııalyq fılmder boıynsha І oryn - «Túlki men qyrǵaýyl» fılmi (rej: Erkinbek Darıha, Ómirqulova Juldyz), ІІ oryn «Asar» fılmi (rej: Júnisov Bereke), ІІІ oryndy «Naýryz» fılmi (rej: Býrıbekov Ońlasyn) aldy.
Talantty jastarymyzdyń eńbegin baǵalaǵan mamandar «Ózekti taqyrypty qozǵaǵany úshin» nomınatsııasymen - «Tabıǵatty aıalaıyq» anımatsııalyq fılmi alsa, «Erekshe montaj jumysy úshin» nomınatsııasymen - «Jyldamdyq» áleýmettik rolıgi. Al «Erekshe operatorlyq jumysy úshin» nomınatsııasymen «Jemqorlyq» áleýmettik rolıgi marapattaldy.
Festıvalge qatysqan fılmder «Ońtústikfılm» mekemesinde, balalar úılerinde, ınternattarda 23 qyrkúıekten 3 qazanǵa deıin kórsetiledi.
Baıqaýda jeńimpaz atanǵan fılmder 5 qazannan bastap jergilikti jáne respýblıkalyq «Balapan» telearnasynan kórsetilimderi uıymdastyrylady.
