OQO-da eýropalyq sapada jıhaz shyǵaratyn fabrıka iske qosyldy
ShYMKENT. QazAqparat - Ońtústik Qazaqstan oblysy Saıram aýdanynda jylyna 4 myń komplekt jıhaz shyraýǵa qaýqarly jańa fabrıka iske qosyldy, dep habarlaıdy oblys ákiminiń baspasóz qyzmeti.
Quny 506 mln teńge bolatyn jobanyń 300 mln teńgesin kásipker «Bıznestiń jol kartasy-2020» baǵdarlamasy aıasynda alǵan. Munda 70 adam turaqty jumyspen qamtylyp otyr.
Fabrıkanyń jumysymen tanysqan oblys ákimi J.Túımebaev shaǵyn jáne orta kásipkerlikti damytý, bul el ekonomıkasynyń damýynyń kepili ekenin aıtty.
«Jalpy ónerkásipti damytý Elbasymyzdyń bizdiń aldymyzǵa qoıǵan mindetiniń biri. Búgin mine, Saıram aýdanynda qanshama turǵyndy jumyspen qamtyp otyrǵan jańa kásiporyn ashylyp otyr. Sonymen qatar, fabrıkanyń ashylýymen aýdannyń óńdeý ónerkásibindegi úlesi artatyn bolady. Sizder óz sózderińizde fabrıkanyń ónimi Italııa jıhazdarynan kem bolmaıdy dedińizder. Budan bylaı jurt «Saıram sapasy» degen termındi qoldanatyndaı dárejege jetińizder», - degen ákim kásiporynnyń jumysshylaryna sáttilik tiledi.
Mundaǵy ónimniń sapasy joǵary sapaly nemis jáne ıtalııalyq jabdyqtar men zamanaýı materıaldardy paıdalaný arqyly qamtamasyz etiledi. Sondaı-aq, fabrıka ónimderi sapa menedjmenti men ekologııalyq taza degen sertıfıkatpen rastalǵan. Budan bólek, óndiris orny Italııa dızaınerlerdiń qatysýymen ekologııalyq taza materıaldardy jáne senimdi komponentterdi paıdalana otyryp, tutynýshyǵa tek joǵary sapaly jıhaz usynbaq.
«Bella Mebel» taýar belgisimen shyǵatyn fabrıkanyń ónimderin aldaǵy ýaqytta elimizdiń barlyq aımaqtaryndaǵy jıhaz dúkenderinen satyp alýǵa bolady.
Jalpy Saıram aýdanyndaǵy ónerkásip qurylymynyń 86 paıyzyn óńdeý ónerkásibi qurasa, onyń ishinde jıhaz shyǵarý salasyndaǵy úlesi 1 paıyzdy ǵana quraıtyn. Osy rette, aýdanda ashylyp otyrǵan jıhaz shyǵaratyn fabrıka ónim kólemin 600 mln teńgege deıin arttyryp, óńdeý ónerkásibindegi úlesi 3 paıyzǵa deıin artpaq. 
