OQO-da etnomádenı birlestikter jarysqa tústi

ShYMKENT. QazAqparat - Ońtústik Qazaqstan oblysynda Qazaqstan halqy Assambleıasynyń uıymdastyrýymen Shymkent qalasyndaǵy jeńil atletıkalyq sport kesheninde etnomádenı birlestikter arasynda spartakıada ótti, dep habarlaıdy QazAqparat tilshisi.

Oblystaǵy etnomádenı birlestikterdiń jáne oblys ákimi apparaty «Qoǵamdyq kelisim» KMM qyzmetkerlerinen qurylǵan komandalar kishi fýtbol, shahmat, ústel tennısi, qashyqtyqqa júgirý, arqan tartý sekildi sport túrlerinen ózara synǵa tústi.  Osymen 10-shy ret ótip jatqan sharanyń ashylý saltanatyna oblystyq Qazaqstan halqy Assambleıasy tóraǵasynyń orynbasary Muratáli Qalmuratov qatysyp, barsha qatysýshylarǵa sáttilik tiledi.

Óńirdegi etnostardyń dostyǵyn, berekeli birligin odan ári nyǵaıtýda mundaı sharalardyń mańyzy zor ekendigine toqtaldy. Asa tartysty ótken saıys nátıjesinde bas júldeni oblystyq ózbek etnomádenı birlestigi jeńip aldy. Al, birinshi orynǵa oblystyq slavıan etnomádenı birlestigi ıe boldy.

Sonymen qatar ekinshi oryn sheshen-ıngýsh etnomádenı birlestiginiń, úshinshi oryn uıǵyr etnomádenı birlestiginiń atynan qatysqan komandaǵa buıyrdy. Jarys jeńimpazdary men júldegerleri qarjylaı syılyqqa ıe boldy.