OQO-da «EtnoArtFest» halyqaralyq festıvali máresine jetti
ShYMKENT. QazAqparat - Ońtústik Qazaqstan oblysynda uıymdastyrylǵan «EtnoArtFest» halyqaralyq mádenı-etnıkalyq festıvali óz máresine jetti. Saıram-Ógem ulttyq parkinde tamyzdyń 15-20 kúnderi aralyǵynda ótken sharada qolóner qalashyǵy qurylyp, sońy kontserttik baǵdarlamaǵa ulasty, dep habarlaıdy QazAqparat HAA tilshisi.
Ońtústik Qazaqstan oblysynyń ákimdigi men «QazaqGeography» qoǵamy birlesip ótkizgen sharaǵa bas-aıaǵy 500-ge tarta qonaq qatysty. Olar Tólebı aýdanyndaǵy ulttyq parktiń tamasha tabıǵatymen tanysyp, bes kún boıy taýdyń taza aýasymen tynystady. Ózderimen birge alyp kelgen aqshatyrlarda túnep, órkenıetten alys jerde ómir súrýdi úırendi. Festıvaldi uıymdastyrýshylardyń sózinshe, bul ártúrli jastaǵy el azamattarynyń tabıǵatqa degen súıispenshiligin arttyrdy.
«Alǵashqy kúni qonaqtarymyz taýdaǵy ómirge beıimdelip, ornalasty. Keıingi kúnderi bıikte ornalasqan kólderge kóterilip, Ulttyq parktiń tabıǵatyn aralap kórdi. Odan bólek, túrli sporttyq jarystar uıymdastyrdyq. Meniń oıymsha festıval óte tanymdy ótti. Qatysýshylar ózderin tabıǵat aıasynda ómir súrip, bir synap kórdi. ıAǵnı, tabıǵatta tura alamyn ba, osyndaı sharttarda tura alamyn ba dep. Mysaly maǵan óte unady. Kez-kelgen jaǵdaıda tabıǵatta tura alady ekenmin», - dedi «QazaqGeography» qoǵamynyń menedjeri Toǵjan Dáýitbaeva.
Qonaqtardyń arasynda Ońtústik óńiriniń turǵyndary kóptep boldy. Olardyń qatarynda qarapaıym jumysshydan sportshylarǵa deıin bar. Máselen, «Jańa talap» týrıstik kompanııasynyń qoldaýymen kelgen eskek esýshi jastar taýdyń tabıǵatyna tamsanyp, tynyǵyp aldyq deıdi. Ásirese skaırannıng bıiktikke júgirý jarysynyń óte qyzyqty bolǵanyn aıtady.
«Biz Ońtústik Qazaqstan oblystyq eskek esý federatsııasynan 8 sportshymyzben keldik. Kelgen kúnnen beri taý tasta aralap, barlyq jerin araladyq. Óte qatty unady. Búgin skaıranıng taýǵa júgirý sportyna qatysyp, 6 shaqyrym bıiktikke júgirdik. Jarysqa bizden basqa da sprotshylar qatysty. Sporttyń bul túri bizdiń jastarymyzdyń da qyzyǵýshylyǵyn týǵyzdy. Aldaǵy ýaqytta da jıi-jıi kelip tursaq degen josparlar qurdyq», - deıdi jattyqtyrýshy Erkebulan Keńesov.
50-ge tarta týrıster qatysqan jarystyń jeńimpazy bolyp 23 jastaǵy Málik Ábdiáset tanyldy. Ol márege nebári 43 mınýtta jetip keldi. Skaıranıng sportymen aınalysyp júrgenine bir jarym jyl bolǵan sportshy taý baýraıyndaǵy Saıram sý aýylynda turady eken. Bir jyldan beri sporttyń osy túrimen jattyǵyp, birqatar jarystarda jeńismpaz atanǵan.
«Ótken jyly osy festıvaldegi jarysqa qatysyp kórip edim, birinshi oryn aldym. Sodan beri qyzyǵýshylyǵym artyp, ár qatysqan jarystarda jyldamdyǵymdy asyryp jatyrmyn. Máselen, Almatyda ótken jarysta 3-shi oryn, Pık Nursultan shyńyna shyǵý jarysynda 1-shi oryndy jeńip aldym. Qazyǵurt taýynda 6 shaqyrym bıiktikke 38 mınýtta shyǵyp, rekord jasadym. Al, búgin 2200 metr bıiktikke shyqtyq. Qazir meni Almaty, Shymkent qalasynyń jattyqtyrýshylary shaqyryp jatyr. Bolashaqta Qazaqstan jáne Álem chempıony atansam degen armanym bar», - deıdi jarystyń jeńimpazy Málik Ábdiáset.
Festıvaldiń sońǵy kúni ulttyq parkte «Qolóner» qalashyǵy boı kóterdi. Onda kúngeıdegi ár túrli ulttyń etno-mádenı ortalyqtary salt-dástúrlerin kórsetetin kórme uıymdastyryp, ulttyq taǵamdaryn daıyndady. Kontserttik baǵdarlamalar qoıyp, óz tilderinde án shyrqady. Bı bılep, taýǵa kelgen týrısterge kóterińki kóńil kúı sylady. 
