OQO-da erekshe bilim berý qajet balalarǵa arnalǵan ortalyq ashyldy
ShYMKENT. QazAqparat - Búgin Ońtústik Qazaqstan oblysynda erekshe bilim berýdi qajet etetin balalarǵa arnalǵan psıhologııalyq-pedagogıkalyq túzetý kabıneti ashyldy, dep habarlaıdy óńir basshysynyń baspasóz qyzmeti.
Damýynda aýytqýy bar balalardy túzetýmen aınalysatyn óńirimizdegi alǵashqy mekemeniń jumysymen tanysqan oblys ákimi Janseıit Túımebaev ortalyqtyń mańyzdylyǵyna toqtaldy.
«Balalardyń ómirin jaqsartyp, laıyqty jáne tabysty bolashaqqa qol jetkizýge múmkindik berý úshin der kezinde bilikti mamandardyń kómegi aýadaı qajet bolady. Sondyqtan da erekshe oqytýdy qajet etetin balalarǵa jáne olardyń otbasylaryna tıisti járdem kórsetetin osyndaı ortalyq ashylyp otyr. Endi búldirshinderimiz bilikti mamandardyń demeýimen qatardan qalmaı tıisti deńgeıde bilim ala alatyn bolady», - dedi Janseıit Qanseıituly.
Bul "Dara" qaıyrymdylyq qory, Ońtústik Qazaqstan oblysynyń bilim basqarmasy, "Samruk-Kazyna Trust" qaıyrymdylyq qorynyń qoldaýymen ashylǵan elimizdegi segizinshi kabınet. Onda defektolog, psıholog, logoped, sýrdopedagog, tıflopedagog syndy mamandar qyzmet kórsetedi. Aqysyz túrde qyzmet kórsetetin túzetý kabıneti jylyna 150 balaǵa deıin emdeý jumystaryn júrgize alady.
Jıyn barysynda óńir basshysy "Dara" qaıyrymdylyq qorynyń quryltaıshysy Gúlnar Dosaevaǵa ortalyqtyń qurylýyna súbeli úles qosqany úshin alǵys bildirdi. Óz kezeginde G. Dosaeva mundaı ortalyqta dáris alyp, em qabyldaǵan naýqas balǵyndardyń qatarǵa tez qosylyp ketýine mol múmkindik bolatynyn aıtty.
Aıta keteıik, Shymkent qalasynda toǵyz myńnan astam erekshe bilim berýdi qajet etetin jetkinshek bar. Onyń ishinde 4000-nan astam balanyń múmkindigi shekteýli bolsa, 672 bala mektepke deıingi damýynda aýytqýy barlar sanatyna jatady. Jańadan ashylǵan ortalyq kómekke zárý jandarǵa tolyqtaı kómek kórsetedi degen senim mol.
