OQO-da energetıka salasynyń mamandary marapattaldy
ASTANA. QazAqparat - Búgin Ońtústik Qazaqstan oblysynyń ákimi Janseıit Túımebaev «Energetıkter kúnine» arnalǵan merekelik saltanatty sharada sala mamandaryn quttyqtady, dep habarlaıdy óńirlik ákimdiktiń baspasóz qyzmeti.
«Memleket basshysy Nursultan Ábishuly Nazarbaev el energetıkasynyń damýyna asa kóńil bólip keledi. Óıtkeni energetıka salasy - kez-kelgen qoǵamnyń, qaryshtap damyp otyrǵan eldiń ekonomıkasynyń altyn ózegi. Barlyq salalardyń óz deńgeıinde órkendeýi, tipti úıdegi jaılylyq, jaryq pen jylý da energetıkaǵa baılanysty»,- dedi Janseıit Qanseıituly.
Óńir basshysy TMD Qurmet energetıgi gramotasymen, TMD Eńbegi sińgen energetıgi, Qazaqstan energetıkter qaýymdastyǵynyń Eńbek sińirgen energetıgi, Qazaqstan energetıkter qaýymdastyǵynyń Qurmetti energetıgi tósbelgilerimen jáne oblys ákiminiń Alǵys hattarymen osy salaǵa eńbegi sińgen azamattardy marapattady. Sonymen qatar birqatar mamandarǵa oblystyq máslıhattyń Gramotasy jáne Alǵys hattary tabys etildi.
Oblystyq Energetıka jáne turǵyn úı-kommýnaldyq sharýashylyq basqarmasynyń uıymdastyrýymen ótken sharada jalpy sany 92 adam marapattaldy.
Oblysta elektroenergııany óndirý tapshylyǵyn birshama azaıtý maqsatynda Shardara sý elektr stantsııasynyń qýatyn 100 MVt-tan 126 MVt-qa ulǵaıtý jumystary júrgizilýde. Al, óńirde jańǵyrmaly energııa kózderin damytý baǵytynda 28 jobany júzege asyrý múmkindigi anyqtalǵan. Onyń ishinde 2014-2015 jyldary Saryaǵash aýdanynda qýaty 2 MVt bolatyn «Rysjan» shaǵyn sý elektr stantsııasy men Saıram aýdanynda jáne Shymkent qalasynda qýaty 1 MVt bolatyn 2 kún elektr stantsııasy paıdalanýǵa berildi.
2009-2016 jyldary bıýdjet esebinen oblystyń aýdan, qalalarynda 3067 shaqyrym elektr jelisi jáne 1087 dana transformator, 8 dana 110-35 kılovolttyq qosalqy stantsııalar paıdalanýǵa berildi. Atap aıtqanda, Shymkent qalasynda 110/10 kV-tyq «Samal», 35/10 kV-tyq «Nursát», «Bozaryq», «Aqtas», Túrkistan qalasynda 110 kV-tyq «Kommýnaldyq», «Novaıa», Lenger qalasynda 35/6 kV-tyq «Shańyraq», Saryaǵash qalasynda 35/10 kV-tyq «Samal» stantsııalary iske qosyldy. Nátıjesinde 595 myń turǵyn, áleýmettik, shaǵyn jáne orta bıznes nysandary turaqty, sapaly elektr qýatymen qamtyldy. Sonymen qatar, Shymkentte jabyq túrdegi zamanaýı 220-110 kılovolttyq «Bozaryq», «Astana-1» «Astana-2» qosalqy stantsııalarynyń qurylystary júrgizilýde.
«Ońtústik Jaryq Tranzıt» JShS ınvestıtsııa esebinen 25 656,7 mln. teńgege 5 012,6 shaqyrym elektr jelisin jáne 834 transformatorlar men qosalqy stantsııalar jańǵyrtyldy. Shymkent qalasynda jabyq túrdegi 110/10 kılovolttyq «Soltústik», «Nursát» qosalqy stantsııalary paıdalanýǵa berildi.
«Nurly jol» baǵdarlamasy aıasynda 2014-2015 jyldary Shymkent qalasynda 14 shaqyrym magıstraldy jylý qubyry jańǵyrtyldy.
«Energoortalyq» AQ tarapynan qurylys jumystary júrgizilip, 4 sektsııaly №4 gradırnıa, dıametri 1020 mm bolatyn 22 shaqyrym jylý trassasy iske qosyldy, stantsııanyń negizgi jáne qosalqy qondyrǵylary kúrdeli jóndeýden ótkizildi.
