OQO-da elektrondy memqyzmetterdiń úlesi 75 paıyzǵa ósti
Bul týraly óńirlik kommýnıkatsııalar qyzmetinde ótken brıfıngte QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń OQO boıynsha departamentiniń basshysy Álı Kómekbaev málim etti, dep habarlaıdy QazAqparat tilshisi.
Departament basshysynyń sózinshe, aımaqta elektrondyq túrdegi memlekettik qyzmetterdiń úlesi 2017 jyldyń sońynda 52,6 paıyz kóleminde bolǵan. Sondaı-aq, 8500-den asa memlekettik qyzmetshiler jáne bilim, densaýlyq salasynyń 105 myńǵa jýyq mamandary búgingi tańda HQKO-na barmaı-aq qajetti qyzmetterdi elektrondy túrde alyp keledi. Qyzmet kórsetetin memlekettik organdar men uıymdarda 660 dana «Ózine-ózi qyzmet kórsetý buryshtary» ornalastyrylǵan. Osy atqarylǵan jumystardyń nátıjesinde qyzmet alýshy men qyzmet berýshiler arasyndaǵy tikeleı baılanys 2 esege tómendep otyr.
Memleket basshysy bıylǵy Qazaqstan halqyna Joldaýynyń 9-shy baǵytynda jemqorlyqty aldyn alýǵa baǵyttalǵan kúres ári qaraı jalǵasa beretinin atap ótti. Osyǵan oraı Departament qyzmetterdiń sapaly, ári ýaqtyly kórsetilýin qadaǵalaýmen qatar sybaılas jemqorlyq deńgeıin tómendetý jumystarymen aınalysyp keledi.
«Oblys ákiminiń qoldaýymen mektepterde syılyqtar alý, ata-analar men oqýshylardan negizsiz aqsha jınaý derekterin boldyrmaý maqsatynda oblystaǵy bilim berý uıymdarynda Departamenttiń «WhatsApp» nómiri men 51-51-51 senim telefony jadynamalary ilinip, www.memkyzmet.kz saıtynda «bilim» aıdary ashyldy», - dedi Álı Amantaıuly.
Sondaı-aq, baspasóz máslıhatyna qatysqan oblystyq arnaıy monıtorıngtik tobynyń basshysy Ádilhan Isabaev azamattarmen keri baılanys ornatý maqsatynda «Qoǵamdyq baqylaý kartasy» ázirlengendigin aıtty.
«Qoǵamdyq baqylaý kartasynyń jumysy 8-775-869-21-21 nómirindegi «ýatsapp», «telegramm» qosymshasy men «feısbýk», «vkontakte», «ınstagram» áleýmettik jelilerindegi «Arnaıy monıtorıng toby OQO» paraqshalary arqyly júzege asyrylady. Ár aýdan, qaladan qoǵamdyq baqylaý kartasyna jaýapty adam belgilengen», - dedi Ádilhan Begalyuly.
Atalǵan baılanys jelileri arqyly árbir azamat óziniń aryz-shaǵymdary men usynystaryn joldaı alady. Mundaı zamanaýı keri baılanystar memlekettik qyzmet kórsetý salasyndaǵy zańsyzdyqtardy joıýǵa edáýir úles qosatyn bolady.
