OQO-da Elbasynyń «Rýhanı jańǵyrý» baǵdarlamalyq maqalasynyń júzege asyrylý barysy talqylandy
ShYMKENT. QazAqparat - Ońtústik Qazaqstan oblysynda Elbasynyń «Rýhanı jańǵyrý» baǵdarlamalyq maqalasynyń júzege asyrylý barysyn talqylaý maqsatynda keńeıtilgen májilis ótti. Onda maqala aıasynda atqarylyp jatqan aýqymdy sharalardyń barysy sóz boldy, dep habarlaıdy QazAqparat HAA tilshisi.
Májiliske L.Gýmılev atyndaǵy Eýrazııa Ulttyq ýnıversıteti rektorynyń áleýmettik-mádenı damý jónindegi prorektory Dıhan Qamzabekuly, alashtanýshy, L.Gýmılev atyndaǵy Eýrazııa Ulttyq ýnıversıteti «Otyrar» kitaphanasy ǵylymı-zertteý ortalyǵynyń dırektory, f.ǵ.d. professor Tursyn Jurtbaı, f.ǵ.d. professor, QR UǴA korrespondent múshesi Amantaı Shárip, Alash arysy Qoshke Kemeńgerulynyń urpaǵy Rızabek Kemeńger, aqyn, qalamger Serik Seıtman, QR UǴA múshe-korrespondenti f.ǵ.d. professor Sherýbaı Qurmanbaıuly, Alash arysy Qoshke Kemeńgerulynyń urpaǵy, L.Gýmılev atyndaǵy Eýrazııa Ulttyq ýnıversıteti qazaq ádebıeti kafedrasynyń dotsenti, f.ǵ.k, Qaıyrbek Kemeńger qatysty.
Májiliste sóz alǵan óńirlik Jobalyq keńseniń basshysy Baqytjan Áshirbekov Elbasy baǵdarlamasynyń Ońtústik Qazaqstan oblysynda iske asyrylýy jóninde baıandama jasap, atqarylǵan jumystarǵa toqtaldy.
Óńirdegi atqarylǵan jumystarǵa qanyqqan Dıhan Qamzabekuly Elbasynyń «Rýhanı jańǵyrý» baǵdarlamasynyń mańyzdylyǵy jaıynda sóz qozǵady. Ol sondaı-aq, respýblıka kóleminde qolǵa alynǵan jobalyq menedjment jumysy boıynsha Ońtústik Qazaqstan oblysyndaǵy qoǵamdyq sanany jańǵyrtý jobalyq keńsesi tarapynan júzege asyrylyp jatqan jumystarǵa oń baǵasyn berdi.
«Búginde elimizdiń basqa aımaqtarymen salystyrǵanda Ońtústik Qazaqstan oblysynda júıeli jumystardyń jasalynyp jatqanyn baıqaýǵa bolady. Osy rette Ońtústik Qazaqstan oblysynyń ákimi Janseıit Qanseıitulynyń bastamasymen birqatar ıgi ister qolǵa alynyp jatqanyna qanyqtyq. Óńirlik Jobalyq keńse jumysy da jolǵa qoıylǵanyn baıqaý qıyn emes» ,- dedi Dıhan Qamzabekuly.
Munan soń sóz alǵan professor Tursyn Jurtbaı ulystyń uıytqysyna aınalǵan ońtústiktiń jaqsy qasıetteri jaıly paıymdy pikirin bildirdi.
Jıyn barysynda oblys ákimdiginiń janynan qurylǵan jobalyq keńse qyzmetkerleri baǵdarlamalyq maqalany júzege asyrý boıynsha ózderiniń usynys, pikirlerin jetkizdi.
