OQO-da Elbasy kitaphanasynyń kóshpeli kórmesi ashyldy
Memleket basshysynyń táýelsiz Qazaqstan eliniń qalyptasýyndaǵy sheshýshi rólin jan-jaqty kórsetý maqsatynda uıymdastyrylǵan kórmede ońtústikqazaqstandyqtar nazaryna Elbasy kitaphanasynyń arhıv, kitap, mýzeı qorlarynan alynǵan materıaldar usynyldy, dep habarlaıdy QazAqparat tilshisi.Kórmeniń ashylý saltanatyna QR Prezıdenti Keńsesiniń bastyǵy - «QR Tuńǵysh Prezıdenti - Elbasynyń kitaphanasy» MM-niń dırektorynyń mindetin atqarýshy Mahmut Qasymbekov pen oblys ákimi Janseıit Túımebaev, sondaı-aq QR Mádenıet jáne sport mınıstrliginiń jaýapty hatshysy Qýatjan Ýálıev pen oblys zııalylary men jastary, BAQ ókilderi qatysty.
Sharada sóz alǵan Mahmut Qasymbekov kórmeni shyraıly Shymkent qalasynda ótkizý kezdeısoq emes ekenin atap ótti.
«Ókinishke oraı, elimizdiń shet óńirlerindegi turǵyndardyń osy kórmeni tamashalaýǵa múmkinshiligi joq. Soǵan baılanysty bizder byltyrǵy jyldan beri mýzeıdiń kóshpeli kórmesin uıymdastyryp jatyrmyz. Mine búgin halqy jıi shoǵyrlanǵan, 3 mln-ǵa jýyq turǵyny bar oblysqa alyp keldik. Bul kórmeniń quramynda óte sırek kezdesetin eksponattar bar. Ónerdiń ár túrli týyndylary bar. Olardyń barlyǵyn Elbasymyzǵa kezinde shetel memleketteriniń, halyqaralyq uıymdardyń basshylary syıǵa tartqan. Jáne kórmeniń eń bir qundylyǵy Elbasy ózi qol qoıǵan tarıhı qujattar bar. Bul kórmeniń asa bir qundy jádigerleri Elbasymyzǵa shetel memleket basshylarynyń joralǵy nagradalary men marapattary, ordenderiniń túpnusqasy ákelingen»,- dedi «QR Tuńǵysh Prezıdenti - Elbasynyń kitaphanasy» MM dırektory Mahmut Qasymbekov.
Kórmege Astanadaǵy Elbasy mýzeıinen 800-ge jýyq túpnusqa qoljazba, sýretter jáne jeke zattary ákelindi. Kóshpeli keshen kórmesi «Kóshbasshy joly», «Kóshbasshy fenomeni», «Álem tanyǵan, Kóshbasshy», «Elbasy mártebesi - el mártebesi» atty tórt bólimnen quralǵan. Uıymdastyrýshylardyń aıtýynsha, alǵash ret Ońtústik jurtshylyǵyna N.Á. Nazarbaevtyń ózge eldiń basshylarynan berilgen joǵary memlekettik nagradalary, qazaqstandyq avtorlar jáne memleket basshylary tartý etken qoltańbasy bar kitaptar, Elbasynyń shet tilderine aýdarylǵan kitaptary usynylyp otyr.
Mazmuny men deńgeıi turǵysynan asa mańyzdy is-sharanyń Ońtústik óńirinde ótýi úlken mártebe, ári zor maqtanysh ekenin aıtqan oblys ákimi Janseıit Túımebaev jınalǵan qaýymdy keshendi jyljymaly kórmeniń ashylýymen quttyqtap ótti.
«Memleket basshysy Qazaqstan tarıhyndaǵy sheshýshi kezeńde erkindik pen táýelsizdikti ańsaǵan halyqtyń asyl armanyn oryndady. Elimiz áleýmettik-ekonomıkalyq turǵyda órkendep, halqymyzdyń ál-aýqaty jaqsardy. Bul kórmede qonaqtar Ult Kóshbasshysynyń osynaý taǵylymy mol eńbekterimen de tanysa alady. Demek, bul sharanyń turǵyndarǵa, ásirese, elimizdiń jastaryna bereri mol», - dedi Janseıit Qanseıituly.
Ońtústik óńirinde bastaý alǵan kóshpeli kórme 2018 jyldyń mamyr aıyna deıin jalǵasatyn bolady. Joba aıasynda halyqaralyq ǵylymı konferentsııa, aımaqtyq kásibı sessııa, sholý jáne taqyryptyq ekskýrsııalar ótedi dep josparlanyp otyr. «Túrkistan» kontsert zalynda Prezıdent orkestriniń kontserti uıymdastyrylady dep kútilýde.
Sondaı-aq, kıeli Túrkistan qalasynda kezdesýler jáne oblystyń birneshe oqý oryndarynda semınarlar men konferentsııalar uıymdastyrylady.
