OQO-da «EKSPO-2017» kórmesiniń týrızm salasyndaǵy oryny túsindirildi

ShYMKENT. QazAqparat - Ońtústik Qazaqstan oblysynyń Otyrar aýdanyna qarasty Kóksaraı aýylynda QR Táýelsizdiginiń 25 jyldyq mereıli merekesi aıasynda «EKSPO - 2017» - kórmesiniń týrızmde alatyn orny men mańyzy» atty kezdesý keshi ótti, dep habarlaıdy aýdan ákimdiginiń baspasóz qyzmeti.

Sharanyń maqsaty kelesi jyly elimizde ótetin «EKSPO - 2017» halyqaralyq kórmesiniń týrızmdi damytýdaǵy alatyn orny jaıynda keńinen nasıhattaý, urpaqtar sabaqtastyǵy turǵysynda ár býynnyń bolashaqqa degen kózqarasyn aıqyndap, olardy qoǵam jańalyqtarynan jáne ózgeristerinen tys qalmaýǵa baýlý, memleketimizdiń jetistikterin kórsete otyryp, jastardyń boıynda patrıottyq sezimin oıatý. Kezdesý jıynyna aýdan ákimi apparatynyń basshysy A.Qurman qatysyp, jıyn qonaqtaryn el Egemendiginiń 25 jyldyǵy mereıli merekesimen quttyqtady.

 2017 jyly Qazaqstannyń astanasy «EKSPO - 2017» halyqaralyq mamandandyrylǵan kórmesiniń ótkiziletin oryny bolyp belgilendi. Astana qalasynda ótetin kórme TMD elderi men Ortalyq Azııa aýmaǵyndaǵy ótkiziletin eń alǵashqy halyqaralyq deńgeıdegi kórme bolmaq. Kórmege álemniń 100-den asa elinen 5 mıllıonǵa jýyq qonaqtar keledi dep kútilýde. Osy oraıda elimizdiń týrızm salasynda bir serpilis bolatyny aqıqat. Halyqaralyq kórmeniń qonaqtary tarıhı jerlerdi aralaý barysynda kıeli Otyrar aýdanyna da soqpaı ketpeıtini belgili. Óıtkeni, Otyrar babtardyń baby Arystanbab babamyzdyń jatqan jeri, álemniń ekinshi ustazy bolǵan Ábý Nasyr ál-Farabıdiń otany. Osyǵan baılanysty aýdan basshysy aýdanymyzda týrızmdi damytýǵa erekshe kóńil bólý kerek degen bolatyn. Shara barysynda aýdanymyzda týrızmdi damytý barysynda jasalyp jatqan ıgi ister keńinen nasıhattalyp, alda atqarylar ister munymen shektelmeıtini týraly sóz boldy. Jıynda mektep oqýshylary qonaqtarǵa saýaldaryn qoıyp, «EKSPO - 2017» halyqaralyq mamandandyrylǵan kórmesi jaıynda keńinen málimetter aldy. Kezdesý jıynynyń sońy mektep oqýshylary daıyndaǵan kontserttik baǵdarlamaǵa ulasty.