OQO-da ekiqabat áıelin óltirip, órtep jibergen turǵyn sottaldy
ShYMKENT. QazAqparat - Ońtústik Qazaqstan oblysynda ekiqabat áıelin óltirip, órtep jibergen turǵyn sottaldy. Oblystyq qylmystyq ister jónindegi mamandandyrylǵan aýdanaralyq soty qanypezer ákeni 15 jylǵa bas bostandyǵynan aıyrdy, dep habarlaıdy QazAqparat HAA tilshisi.
Alqa bılerdiń qatysýymen ótken sot otyrysy ótken jyldyń jeltoqsan aıynda bastalǵan edi. Óz áıelin qylqyndyryp óltirgen aıyptalýshynyń isi osy ýaqyt aralyǵynda tolyǵymen dálelin tapty.
Eske salaıyq, qaıǵyly oqıǵa ótken jyldyń tamyz aıynda oryn alǵan. Abaı aýylynda turatyn erli-zaıyptylar arasynda jıi urys-keris bolyp, ajyrasýǵa deıin barypty. Ashýǵa býlyqqan kýıeýi kelinshegin tipti kólikpen qaǵyp ketken jaǵdaılar da oryn alǵan eken. Alaıda úsh balasynyń bolashaǵyn oılaǵan 27 jastaǵy Nýrıpa Qurbanova joldasynyń jaısyz minezine qaramastan shydap júredi. Óıtkeni tórtinshi perzentine júkti bolǵan.
«Sońǵy urysqan kúni ol perzentteriniń joqtyǵyn paıdalanyp, áıeliniń artynan kelip, moınynan qylqyndyrady. Sóıtip kelinshegin óz qolymen óltirgen. Óli denesin Jaskeshý aýyly mańynda Keles ózeniniń janyndaǵy shuńqyrǵa tastaıdy. Bir kún ótken soń polıtsııaǵa baryp, áıeliniń joǵalyp ketkeni jóninde aryzdanǵan. Ondaǵylarǵa Shymkenttegi bazarǵa taýar alýǵa ketken kelinshegim qaıtyp úıge oralmady dep túsindiripti. Al, keshkisin máıitti tastaǵan jerge 5 lıtr ydyspen kerosın aparyp, óli denesin órtep jibergen. Onymen jany jaı tappaǵan aıyptalýshy kelesi kúni keshkisin taǵy baryp, jartylaı janǵan áıeliniń denesin Oshaqty aýyly mańyndaǵy qamystardyń arasyna aparyp tastaǵan», - deıdi sot otyrysyna qatysqan oblystyq prokýratýranyń 10-basqarma prokýrory Shoqan Arshabaev.
Keıinnen kelinshektiń týystary polıtsııaǵa osy kúıeý balasynan kúdiktenetinin aıtqan. Tergeý barysynda onyń rasymen de áıelin býyndyryp óltirgeni tolyǵymen dáleldendi. Aıyptalýshy tipti máıitti qaı jerge tastaǵanyna deıin kórsetip, qylmysyn moıyndaǵan.
Búgin oblystyq qylmystyq ister jónindegi mamandandyrylǵan aýdanaralyq sotynda Saryaǵash turǵyny sottaldy. Sýdıa Ábsattar Shahıddınov aıyptalýshyny 15 jylǵa bas bostandyǵynan aıyrýǵa, jazasyn qatań tártiptegi túrmede ótkizýge úkim kesti.
Dese de jábirlenýshi tarap bul úkimmen keliskisi joq. Olar úkimdi qaıta qaraý jóninde oblystyq sottyń qylmystyq ister jónindegi alqasyna shaǵym túsiremiz dep otyr.
