OQO-da eki táýlikte 3 bala sýǵa ketken
ShYMKENT. QazAqparat - Ońtústik Qazaqstan oblysynda eki táýlikte 3 bala sýǵa ketken. Qazir qutqarýshylar Shymkenttegi Qarasý ózeninen úsh jasar búldirshinniń denesin izdeýde, dep habarlaıdy QazAqparat HAA tilshisi.
Oblystyq tótenshe jaǵdaılar departamenti baspasóz qyzmetiniń málimetinshe, sýǵa batqan úsh bala da ata-anasynyń qaramaýy saldarynan qaıǵyly jaǵdaıǵa dýshar bolǵan. Máselen, Saıram aýdanynda úsh jasar búldirshin baıqaýsyzda aryqqa túsip ketip, mert boldy. Ekinshi jaǵdaı da osy aýdanda tirkeldi. On jastaǵy bala úıdiń aýlasyndaǵy basseınge batyp ketken. Oqıǵa ornyna kelgen dárigerler balany qutqara almady. Al, Qarasý ózenine túsip ketken úsh jasar qyzdyń denesi áli kúnge tabylmaı otyr.
