OQO-da eki búldirshin sýǵa batyp ketti
ShYMKENT. QazAqparat - Ońtústik Qazaqstan oblysynda ótken aptada eki búldirshin sýǵa batyp ketti. Qaıǵyly jaǵdaı Túlkibas pen Saryaǵash aýdanynda boldy, dep habarlaıdy QazAqparat tilshisi.
Oblystyq TJD baspasóz qyzmetiniń málimetinshe, Túlkibas aýdanyna qarasty Jaskeshý aýylynda 29 mamyr kúni oıyn balasy ata-anasynyń nazarynan tys qalǵan. Sóıtip baıqaýsyzda aýyl mańyndaǵy aryqqa túsip ketken. Ony kóre salyp, ata-anasy men kórshileri qutqarýǵa tyrysady. Alaıda aǵystyń qattylyǵynan búldirshin biraz jerge aǵyp ketken. Tek kelesi kúni 17.15-ter shamasynda turǵyndar balanyń denesin sýdan shyǵaryp aldy.
Ekinshi jaǵdaı osy jeksenbi kúni Saryaǵash aýdanynyń Besqubyr aýylynda oryn aldy. Onda da 4 jasar búldirshin kúndizgi saǵat 13.30-dar shamasynda «Qııat» kanalyna túsip ketken. Balanyń denesi jarty saǵattan asa ýaqyttan soń tabyldy.
Aıta keteıik, jyl basynan beri óńirde 19 adam sýdan ajal qushty. Ókinishke oraı, onyń 17-si jas bala bolyp otyr.
Foto: endlesswaves.net
