OQO-da egin orý naýqany bastaldy
ASTANA. QazAqparat - Ońtústik Qazaqstan oblysy elimizde alǵash bop egin orý naýqanyn bastap jiberdi, dep habarlaıdy oblys ákiminiń baspasóz qyzmeti.
Qazyǵurt aýdanyndaǵy «Aıqoja» óndiristik koooperatıvine qarasty egistik alqabyna kombaındar túsip, bıdaıdyń alǵashqy ónimi qambaǵa jóneltildi. Egis orý naýqanynyń kýágeri bolǵan Ońtústik Qazaqstan oblysynyń ákimi Janseıit Túımebaev aýdan basshylyǵyna aldaǵy jyldary arpa, bıdaı egis kólemin arttyryp, ony eksporttaý men tuqymdyq sapasyn jaqsartý máselesine nazar aýdarýdy júktedi.
«Ókinishke oraı, oblysymyzda tuqymdyq sorttardyń zerttelip, saralanýy joǵary dárejede emes. Sondyqtan sharýalar shamalary kelgenshe jergilikti sorttardy paıdalanyp keledi. Osyǵan baılanysty qazir aq egis tuqymdarynyń sapasyn retteý úshin arnaıy baǵdarlama ázirlep jatyrmyz. Sebebi, egin egýde tuqymnyń sapaly bolýy óte mańyzdy»,- dedi Janseıit Qanseıituly.
Jalpy Ońtústik Qazaqstan oblysynda bıyl 218 myń gektar bıdaı egilgen. Odan 401 myń tonna astyq jınalady degen jospar bar. Máselen, bir ǵana Qazyǵurt aýdanynda 38 myń gektar alqapqa arpa-bıdaı egilipti. Dıqandar gektaryna 25,4 tsentnerden ónim jınaımyz dep nıettenip otyr.
«Búginde bizdiń kooperatıvte jer kólemi 12 700 gektarǵa jetip otyr. Onyń 6 700 gektary tálimdi, 1 000 gektary shabyndyq, qalǵany aýyspaly egiske jatady. Ótken jyly 1050 gektar bıdaı alqabynan 24 tsentnerden qambaǵa 2 520 tonna astyq jınadyq»,- deıdi «Aıqoja» óndiristik koooperatıvi tóraǵasynyń orynbasary Saıan Batyrbaev.
Qazirgi tańda munda oraq naýqanynda 30-ǵa jýyq adam eńbek etip jatyr. Jumysshylardyń ortasha jalaqysy 60 myń teńgeden joǵary. Kooperatıvte egin orý naýqanyna tehnıka tolyǵymen jetkilikti. Jalpy bıyldyń ózinde qazyǵurttyq astyq egýmen aınalysatyn qojalyqtar 32 jańa tehnıka aldy.
