OQO-da dúkenderden kıim-keshek urlaıtyndar ustaldy
ShYMKENT. QazAqparat - Ońtústik Qazaqstan oblysynda dúkenderden kıim men aıaq kıimder urlap júrgen eki kúdikti ustaldy. Tergeý barysynda seziktilerdiń 6 urlyq deregine qatysy bar ekendigi anyqtaldy, dep habarlaıdy QazAqparat HAA tilshisi.
Kúdiktiler Tólebı aýdandyq ishki ister basqarmasy qyzmetkerleriniń jedel-izdestirý is-sharalarynyń barysynda qolǵa túsken. Leńgir qalasynyń 1989 jáne 1999 jyly týǵan turǵyndary shaǵyn shahardaǵy saýda ortalyǵynda urlyqpen aınalysyp júrgeni belgili boldy. Polıtseılerdiń málimetinshe, kúdiktiler qylmystaryn túngi ýaqytta qalalyq avtovokzaldyń mańyndaǵy saýda ortalyǵynda jasaǵan. Ondaǵy dúkenderge kirip, ártúrli aıaq kıimderdi urlap ketken. Qazirgi tańda ustalǵan ekeýdiń jábirlenýshilerge keltirilgen jalpy shyǵyn kólemi jarty mıllıon teńgeni qurap otyr. Tártip saqshylary qolǵa túskenderge qatysty Qylmystyq kodekstiń 188-baby «Urlyq» boıynsha is qozǵap, tergeý amaldaryn júrgizýde.
