OQO-da derbes bıýdjettiń artyqshylyǵy talqylandy
Basqosýǵa elimizdiń Ulttyq ekonomıka vıtse-mınıstri Aıbatyr Jumaǵulov pen QR Qarjy vıtse-mınıstri Berik Sholpanqulov, BUUDB Qazaqstandaǵy turaqty ókiliniń orynbasary Mýnhtýıa Altangerel men oblys ákimi Janseıit Túımebaev, sonymen qatar sarapshylar jáne saıasatkerler qatysýda. Almaty men Jambyl, Qyzylorda men Ońtústik Qazaqstan oblystarynyń aýyl ákimderi jalpy sany 400-den astam adam da arnaıy shaqyryldy.
Memleket basshysy N.Nazarbaev «100 naqty qadam» Ult josparynyń 98-qadamy sheńberinde aýdandyq mańyzy bar qala, aýyl, kent jáne aýyldyq okrýg deńgeıinde jergilikti ózin-ózi basqarýdyń derbes bıýdjetin engizýdi tapsyrǵan bolatyn.
Elimizdegi aýyl ákimderiniń basyn qosqan jıynnyń ashylýynda sóz alǵan oblys ákimi Janseıit Túımebaev osyndaı aýqymdy forýmdy uıymdastyrǵan Qazaqstan Respýblıkasynyń Ulttyq ekonomıka jáne Qarjy mınıstrlikteri men Birikken Ulttar Uıymynyń ókilderine alǵys aıtty.
«Aýyl ákimderiniń rólin kúsheıtý boıynsha jumys jalǵasýda. Memleket basshysy Nursultan Ábishuly Nazarbaev Qazaqstan halqyna «Áleýmettik-ekonomıkalyq jańǵyrtý - Qazaqstan damýynyń basty baǵyty» Joldaýynda jergilikti ózin-ózi basqarýdy damytý, jergilikti mańyzy bar barlyq máselelerdi sheshýge azamattardyń qatysýyn keńeıtý qajettigin atap ótken edi. Búginde oblysta derbes bıýdjetke kóshý úshin jan-jaqty daıyndyq jumystar atqaryldy. Aımaqta salyq salý bazasyn naqtylaý maqsatynda memlekettik derekqorlar týraly málimetter salystyryp, jańartyldy. Jyljymaıtyn múlik boıynsha tirkelmegen nysandardyń ıelerin ádilet organdaryna tirkeý iske asyryldy. Bul aýyldyq okrýgterdiń tabysyn arttyrady», - dedi ákim.
Aıta keteıik, óńirde 2018 jyldan bastap derbes bıýdjet 2 myńnan adamnan turatyn 175 ákimshilik birlikte, 2020 jyldan bastap qalǵan altaýyna engiziletin (barlyǵy 181) bolady.
Jıynda sóz alǵan QR Ulttyq ekonomıka vıtse-mınıstri Aıbatyr Jumaǵulov jergilikti ózin ózi basqarýdyń derbes bıýdjetin engizgennen keıin jergilikti turǵyndar qarjynyń jumsalýyn qadaǵalaı alatynyn atap ótti.
«Zańda turǵyndardyń bıýdjettik qarajattyń jumsalýyn jergilikti qoǵamdastyqtyń jınalysyna qatysýshylardan turatyn komıssııa arqyly aýyldyq okrýgtiń bıýdjetiniń oryndalýy monıtorıngin júrgizý jolymen baqylaý tetigi kózdelip otyr.
Osylaısha jergilikti qoǵamdastyqtyń múddesin esepke alý arqyly bıýdjetti josparlaýǵa jáne baqylaýǵa múmkindik beretin tetikter qarastyryldy», - dedi Jumaǵulov.
Aıta keteıik, Qazaqstan Respýblıkasynyń Ulttyq ekonomıka mınıstrligi «Zerde» oqý ortalyǵymen birlesip, aýyldyq okrýg ákimderimen arnaıy oqý kýrsyn uıymdastyrdy. Sonymen qatar, aqparattyq-túsindirý toby aýdandarǵa baryp derbes bıýdjetti jáne kommýnaldyq menshikti engizý máseleleri boıynsha semınarlar ótkizdi. Al oblystyq memlekettik qyzmetshilerdi daıarlaý ortalyǵynyń bazasynda eki myń adamnan astam aýyldyq okrýg ákimderi, sondaı-aq ekonomıka jáne qarjy bólimderiniń qyzmetkerleri oqytylǵan.
