OQO-da depýtat pen ákimniń keńesshisi qaza tapqan jol apatynyń sebepteri belgili boldy

ShYMKENT. QazAqparat - Ońtústik Qazaqstan oblysy ákiminiń keńesshisi Seıit Ertaı men depýtat Qamytbek Aıtóreevter qaza tapqan jol apatynyń sebep saldary belgili boldy. Túrkistan qalasynyń prokýrory Rýslan Ábdiraıymovtyń aıtýynsha jol kólik oqıǵasyna qatysty anyqtaý sharalary aıaqtalyp, is sotqa joldanǵan, dep habarlaıdy QazAqparat tilshisi.

Tergeý barysynda anyqtalǵany, jol apaty jeńil kólik júrgizýshisiniń muqııatsyzdyǵynan oryn alǵan.

«23 shildede Shymkent-Samara tas jolynyń 107 shaqyrymynda bolǵan jol-kólik oqıǵasynan oblysqa  belgili azamattar Seıit Ertaı men Qamytbek Aıtóreev kóz jumdy. Osy is boıynsha sotqa deıingi tergep-tekserý aıaqtaldy. Tıisti saraptama qorytyndylary daıyn boldy. Jol-kólik oqıǵasyna kináli júrgizýshi  1985 jylǵy O.B. degen azamat tergeý barysynda, «Gaz-53» avtokóligin júrip kele jatyr dep oılaǵanyn, onyń toqtap turǵanyn kesh baıqap qalǵanyn óz jaýabynda kórsetti. Tergeý organynyń aıyptaý aktisimen kelisip, O. degen azamattyń isin Túrkistan qalalyq prokýratýrasy QR QK-niń 345-babynyń 4-bóligi boıynsha sotqa joldady»,-deıdi Rýslan Ábdiraıymov.

Qazirgi tańda jol apatynan aýrýhanaǵa túsken júrgizýshiniń densaýlyǵy birshama jaqsaryp, úıine shyǵarylǵan. Ol tergeý barysynda ózi kelip jaýap bergen. Al, qaza tapqan Seıit Ertaı men Qamytbek Aıtóreevtiń týystary aıyptalýshy azamatqa keshirim beripti. Endi jol apatyna sebepshi júrgizýshige qatysty úkimdi Túrkistan qalalyq soty shyǵarady.

Eske salaıyq, 23 shilde kúni kúndizgi saǵat 13:00-der shamasynda Shymkent-Samara tas jolynyń 107 shaqyrymynda jol jıeginde buzylyp turǵan «Gaz-53» júk kóligine «Toıota Prado» avtomobıli soqtyǵysyp, sonyń saldarynan eki jolaýshy qaza tapqan edi. Baqılyq bolǵandar Ońtústik Qazaqstan oblys ákiminiń keńesshisi Seıit Ertaı men oblystyq máslıhattyń depýtaty Qamytbek Aıtóreev edi. Al, Toıota kóliginiń júrgizýshisi aýrýxanada jansaqtaý bólimine túsken bolatyn.