OQO-da departament basshysy qyzmetkerlerinen keshirim surady

ShYMKENT. QazAqparat - Ońtústik Qazaqstan oblysynda memlekettik kirister departament basshysy qyzmetkerlerinen keshirim surady. Ulystyń uly kúni Naýryz meıramyna arnalǵan saltanatty jıynda Altynsary Úmbetálıev ótken jyly atqarylǵan jumystarǵa toqtalyp, qaramaǵyndaǵylardy jyl basynan keshirimdi bolýǵa shaqyrdy, dep habarlaıdy QazAqparat HAA tilshisi.

Aıta keteıik, bıylǵy meıramdy memlekettik kirister departamenti tolymdy tabystarmen qarsy aldy. Departament qyzmetkerleriniń nátıjeli jumystarynyń arqasynda memleketke  42 mlrd teńgeniń ornyna 50 mlrd teńge óndirilip, oblystyń áleýmettik ekonomıkalyq damýyna laıyqty úles qosty.

«Bul jetistikke sizderdiń eńbekterińizdiń arqasynda jettik.Sondyqtan barshańyzǵa alǵys bildiremin. Babalarymyzdyń eń úlken azamattyǵy eger de renjisip, at quıryǵyn úzisip ketse de, bir birimen qaıta qaýyshady. Al, keshirimdi bolý - adamnyń úlken qasıeti. Sondyqtan da men jumys barysynda bireýlerge qatty sóılep qoısam keshirińizder. Aınalamyzǵa jaqsylyq pen baqyt qonsyn. Ulysty uly kúni Naýryz shańyraqtaryńyzǵa  shattyq syılasyn», - dedi A.Úmbetalıev.

Saltanatty jıyn barysynda óz kezeginde memlekettik qyzmet kórsetetin basqarmalar men bólim basshylary sóz alyp, merekelik izgi tilekterin bildirdi. Departament basshysy jetistikterge qol jetkizgen birqatar qyzmetkerlerdi marapattady. Qarjy júıesinde jemisti eńbekteri men memlekettik qyzmettegi minsiz eńbegimen kózge túsken azamattardyń keýdesine «Oblysqa sińirgen eńbegi úshin» medalin taqty. Olarǵa oblys ákiminiń arnaıy alǵys hattaryn tabystady.