OQO-da densaýlyq saqtaý basqarmasynyń burynǵy basshysy úıqamaqqa alyndy
ShYMKENT. QazAqparat - Ońtústik Qazaqstan oblysynda densaýlyq saqtaý basqarmasynyń burynǵy basshysy Jumaǵalı Ismaılov úıqamaqqa alyndy. Oǵan qatysty Qylmystyq kodekstiń eki baby («Paraǵa kommertsııalyq satyp alý» jáne «Uıymdasqan top, qylmystyq uıym qurý jáne olarǵa basshylyq etý, sol sııaqty olarǵa qatysý») boıynsha is qozǵalyp, tergeý amaldary júrgizilýde. Bul týraly oblystyq sottyń baspasóz qyzmeti málimdedi, dep habarlaıdy QazAqparat HAA tilshisi.
Osy jyldyń 11 sáýir kúni Ál-Farabı aýdandyq soty Jumaǵalı Ismaılovty ýaqytsha tergeý abaqtysyna qamaýǵa alý týraly sheshim shyǵarǵan. Alaıda kúdikti 17 sáýir kúni bul sheshimdi qaıta qaraý týraly sotqa shaǵym túsirip, ol kepil túrindegi bultartpaý sharasymen úıqamaqqa alynǵan.
Aıta keteıik, burynǵy basqarma bastyǵy osy kúnge deıin elimizdiń Densaýlyq saqtaý mınıstrligine qarasty Ulttyq ftızıopýlmonologııa ǵylymı ortalyǵynyń dırektory qyzmetin atqaryp kelgen.
Jalpy, daýdyń basy 2012 jyly bastalǵan bolatyn. Ol kezde oblystaǵy aýrýhanalardyń 28 bas dárigeri oblys ákimi Asqar Myrzahmetovtiń atyna oblystyq densaýlyq saqtaý basqarmasynyń bastyǵy Jumaǵalı Ismaılovtyń jumystan shyǵýyn talap etip, hat joldaǵan bolatyn. Medıtsına qyzmetkerleri óz bastyqtarynyń dórekiliginen sharshaǵandyǵyn aıtyp, tender ótkizý kezinde keıbir kompanııalardyń múddelerin qoldaıdy dep aıyp taqqan edi. Sonymen qatar basqarma basshysy tarapynan qýǵynǵa túsip, jumystan shyǵyp qalǵan aımaq dárigerleri olardy jumysqa qaıta ornalastyrýyn talap etti. Osydan keıin oqıǵany tekserýmen oblystyq ákimshilik janyndaǵy arnaıy qurylǵan komıssııa aınalysty. Komıssııa jumysynyń qorytyndysy nátıjesinde oblys ákimi Asqar Myrzahmetov aımaqtyń densaýlyq saqtaý basqarmasynyń bastyǵy Jumaǵalı Ismaılovqa sógis jarııalaǵan bolatyn. Densaýlyq saqtaý basqarmasynyń burynǵy bastyǵynyń qolasyndaǵylarǵa qatysty memlekettik qyzmetshilerdiń ar-namys kodeksin buzǵandyǵy anyqtalǵan edi.
Al, 2014 jyly oblystyq prokýratýra medıtsına salasyna aýqymdy tekserý sharalaryn júrgizip, kóptegen zańbuzýshylyq derekter anyqtaǵan bolatyn. Sonyń saldarynan 20-dan astam emdeý mekemesiniń basshylary qyzmetinen shettetilgen. 2015 jyldyń qańtarynda Jumaǵalı Ismaılov óz erkimen jumystan bosap qalǵany belgili.
