OQO-da densaýlyq festıvali ótti
ASTANA. QazAqparat - Shymkent qalasynda oblystyq densaýlyq saqtaý basqaramasynyń uıymdastyrýymen «Bizdiń densaýlyǵymyz - óz qolymyzda!» atty «Densaýlyq festıvali - 2017» keń aýqymdy aktsııasy ótti.
Oblys ákimi baspasóz qyzmetiniń habarlaýynsha, sharaǵa qala turǵyndary, bilim, densaýlyq saqtaý salalarynyń qyzmetkerleri, mektep oqýshylary men stýdent jastar qatysty.
Aktsııanyń ashylý saltanatynda sóz alǵan Ońtústik Qazaqstan oblysynyń ákimi Janseıit Túımebaev sharanyń salaýatty ómir saltyn qalyptastyrýdaǵy mańyzdylyǵyn atap ótti.
«Elimizdiń uzaq merzimdi «Qazaqstan-2050» damý strategııasynyń eń mańyzdy basymdylyqtarynyń biri densaýlyq, bilim alý men Qazaqstan azamattarynyń ál-aýqatyn arttyryp, salaýatty ómir salty mádenıetin qalyptastyrý bolyp tabylady. Osy oraıda búgingi festıvaldiń bereri mol. Aktsııanyń maqsaty - jurtshylyqty salaýatty ómir saltyn ustanýǵa shaqyryp, qoǵamnyń, buqara halyqtyń nazaryn aýdarý», - dedi Janseıit Qanseıituly.
Aıta keteıik, «Densaýlyq festıvali» 1999 jyldan bastap jyl saıyn qyrkúıek aıynda respýblıkanyń barlyq óńirlerinde ótkiziledi. Bıylǵy jyly aktsııa salaýatty ómir saltyn qalyptastyrý qyzmetiniń 20 jyldyǵy men «EKSPO-2017» halyqaralyq kórmesi aıasynda uıymdastyrylyp otyr.
Aktsııa «Júrý zııan emes, júrmeý zııan» uranymen jaıaý júrý marafonynan bastaldy. Sharaǵa medıtsına uıymdarynyń qyzmetkerleri men stýdent jastar qatysyp, Jeltoqsan kóshesi men D.Qonaev dańǵylynyń qıylysynan ál-Farabı alańyna deıin jaıaý júrip ótti.
Munan soń aktsııaǵa qatysýshylar «Meniń denim saý bolsa, elim saý» fleshmoby men «Salaýatty rýh» atty sporttyq kórinisterin tamashalady. Sonymen qatar, mektep oqýshylarynyń qatysýymen «Paıdaly taǵamdar», «Kúz syıy» atty kórmeleri aıasynda ónimderdiń paıdaly qasıetterin dáripteıtin sheberlik sabaqtary uıymdastyryldy.
Budan bólek, arnaıy qurylǵan «Densaýlyq qalashyǵynda» qala turǵyndary men qonaqtary medıtsınalyq joldamasyz-aq dárigerlerge qaralyp, túrli dıagnostıkalyq tekserýlerden ótip, tegin jedel-analızder tapsyrýǵa múmkindik aldy. Іs-shara sońy kóterińki kóńil-kúı syılaıtyn túrli mádenı-sporttyq baǵdarlamalarǵa ulasty.
