OQO-da daýyl keltirgen shyǵynnyń kólemi anyqtalyp jatyr
ShYMKENT. QazAqparat - Ońtústik Qazaqstan oblysynda dúleı jel 30-dan astam aǵashty qulatyp, memlekettik mekemeler men turǵyn úılerdiń shatyryn ushyryp ketti. Daýyldyń saldaryn joıýǵa óńirdiń tótenshe jaǵdaılar qyzmetiniń 13 mamany men 2 tehnıkasy jáne jergilikti kommýnaldyq qyzmettiń 145 qyzmetkeri men 30 tehnıkasy jumyldyryldy, dep habarlaıdy QazAqparat HAA tilshisi.
Oblystyq TJD baspasóz qyzmetiniń málimetinshe keshe kúndizgi saǵat 14:45-ten 16:00 aralyǵynda óńirde ekpini sekýndyna 21 metrge deıin jel turyp, saldarynan Shymkent qalasy men Báıdibek, Ordabasy, Arys aýdandarynda ǵımarattardyń shatyrlaryn ushyrǵan. Atap aıtqanda Arys qalasyndaǵy №141 «Abaı atyndaǵy jalpy bilim beretin gımnazııa-ınternatynyń» sportzalynyń 150 sharshy metr, Ordabasy aýdanyndaǵy mádenıet úıiniń 500 sharshy metr, Báıdibek aýdany ortalyǵyndaǵy №1 jalpy orta mektep-ınternatynyń 115 sharshy metr shatyry búlindi. Zardap shekkender joq. Qazir atalǵan aýmaqtarda arnaıy komıssııa qurylyp, shatyrlardy qaıta qalpyna keltirý jumystary júrgizilip jatyr.
Al, oblys ortalyǵynda alapat jel negizinen turǵyn úılerge zaqym keltirdi. Máselen, Qursaı shaǵyn aýdany men Qarasý móltek aýdanyndaǵy kópqabatty úıdiń, Ótegenov pen Arǵynbekov kósheleri qıylysyndaǵy jeke úıdiń shatyry ushqan. Osyndaı jaǵdaı Halyqqa qyzmet kórsetý ortalyǵy men «Hımfarm» zaýytynyń dáriler qoımasynda oryn aldy. Jelden aǵashtar túbimen qoparylyp, kólikterdi basyp qaldy. Qazir shaharda tabıǵat apatynan kelgen shyǵyn kólemi anyqtalyp jatyr. Ázirge zardap shekkender týraly málimet joq.
