OQO-da dástúrli «Qazaq dastarhany» festıvali ótti
ShYMKENT. QazAqparat - Ońtústik Qazaqstan oblysynda etnomádenı birlestikterdiń qatysýymen dástúrli «Qazaq dastarhany» festıvali ótti. Óńirdegi túrli etnos ókilderi maqal-mátel aıtý men asyq atýdan saıysyp, qazaqy dastarhan jaıdy, dep habarlaıdy QazAqparat tilshisi.
Qazaqstan halqy Assambleıasynyń oblystyq fılıaly uıymdastyryp jatqan festıval aıasynda ońtústikqazaqstandyq 17 etnomádenı birlestik músheleri qazaqtyń tóńkerme, jórgem, jońqa, kómbe, úlpershek, buqpa, qaryn bórtpe syndy túrli ulttyq taǵamdaryn daıyndady. Ulttyq taǵamdardyń tarıhy men as ázirleýdiń ádis-tásilin is-shara qonaqtary men qazylar alqasyna baıandady. Mıpalaý, qazan jappa, qurt kójeni kópshiliktiń nazaryna usyndy.
Bir úıdiń balasyndaı bolǵan ult ókilderi umyt bola bastaǵan qazaqy taǵamdardy el jadynda jańǵyrtý maqsatynda daıyndaǵandaryn aıtty. Máselen, nemis ultynyń ókilderi naryn týrasa, tatar-bashqurttyqtar qýyrdaq pisiripti. Osylaısha festıvalge kelgen qala turǵyndary dastarhannan dám tatty. Festıval sońynda qazylar alqasy ádil baǵasyn berip, jeńimpazdar marapattaldy. 
