OQO-da dástúrli ánderdiń baıqaýy ótti
ShYMKENT. QazAqparat - Ońtústik Qazaqstan oblysynda «Dástúrli jáne ǵuryptyq án» baıqaýy bolyp ótti. Kúngeıde alǵash ret uıymdastyrylǵan óner saıysyna 9 aýdannan kelgen ónerpazdar qatysty, dep habarlaıdy «QazAqparat» HAA tilshisi.
Elbasy Nursultan Nazarbaevtyń «Bolashaqqa baǵdar: rýhanı jańǵyrý» maqalasyna oraı uıymdastyrylǵan erekshe baıqaýdy oblystyq Ádet-ǵuryp jáne salt-dástúr ortalyǵy uıymdastyrdy. Onda óner ujymdary qazaq ómirindegi eleýli ǵuryptyq jón-joralǵylardan shynaıy kórinister qoıyp, kórermenniń kóńilinen shyqty. Úmitkerler umyt bolǵan án-jyrlardy jańǵyrtyp, taqyrybyna saı salt-dástúrmen sabaqtastyrdy. Qazaqtyń syńsý, jar-jar, besikke salý, toıbastar sııaqty ǵuryptary egjeı-tegjeıli dáripteldi. Olardyń zaman aǵymymen umytylǵan tustary jańǵyrtyldy.
Baıqaý nátıjesinde Báıdibek aýdany mádenıet ujymy bas júldeni, Tólebı aýdanynyń ónerpazdary birinshi oryndy ıelendi. Al, Túrkistan qalasy ekinshi orynǵa, Túlkibas aýdany úshinshi orynǵa ıe boldy. Ulttyq salt-dástúrdi dáripteýge atsalysqan mádenıet ujymdary men jeke tulǵalarǵa ortalyq tarapynan arnaıy alǵys hattar men qarjylaı syılyqtar tabys etildi.
