OQO-da dárigerler shala týǵan úshemdi aman alyp qaldy
ShYMKENT. QazAqparat - Ońtústik Qazaqstan oblysynda shala týǵan úshemniń ómirin dárigerler aman alyp qaldy, dep habarlaıdy QazAqparat tilshisi.
Oblystyq densaýlyq saqtaý basqarmasy baspasóz qyzmetiniń málimetinshe, náresteler 16 qańtar kúni №2 oblystyq perınataldyq ortalyǵynda dúnıege keldi. Olardy analary 21 jastaǵy Gýzal Nýrmımınova ota arqyly bosanǵan. Dárigerler týǵanda salmaǵy nebári 1,5 keli (1495 gramm, boıy - 38 sm, 1590 gramm, boıy - 40 sm, 1640 gramm - boıy 41 sm) bolǵan eki qyz ben bir uldy 40 kún boıy kútip, jetildirgen. Sebebi, jeti aılyq bolyp ómirge kelgen shaqalaqtardyń ókpesi durys damymaı, bári jasandy tynys alý apparatyna qosylǵan.
Keıinnen bes kún boıy jansaqtaý bóliminde jatqan úshemniń beti beri qarap, aldaǵy bir aıdy arnaıy kútim jasaıtyn bólimshede ótkizdi. Ortalyq dárigerleriniń qatań baqylaýynda bolǵan nárestelerdiń árqaısysy osy ýaqyt ishinde bir keliden salmaq qosqan. Aq halattylardyń biliktiligi men kútiminiń, tynymsyz eńbeginiń arqasynda shala týǵan shaqalaqtar aman qalyp, analary olardy baýyryna basa aldy.
Mamandardyń sózinshe, qazir olardyń ómirine tónetin esh qaýip joq. Búgin úshemder men analary perzenthanadan shyqty. Urpaǵy kóbeıip, órisi keńeıgen otbasynyń jas ana men shala týǵan shaqalaqtardyń ómirin arashalap qalǵan dárigerlerge aıtar alǵysy sheksiz.
Aıta keteıik, bul bıylǵy jyly ońtústikte týǵan alǵash úshemder. Jalpy sońǵy 10 jyldyń ishinde oblysta jyl saıyn 7-13 úshem dúnıe esigin ashady. Bir jylda dúnıege keletin egizderdiń sany 800-ge jýyqtap otyr.
